Plie u Myntri Rangbah ïa ka PepsiCo Bottling plant ba 340 klur tyngka ha Mendipathar

Tura, Naitung 30 : U Myntri Rangbah ka Jylla Conrad K Sangma ha ka sngi Balang, ula plie paidbah ïa ka bottling plant kaba heh duh hapoh ka thaiñ Shatei Lam Mihngi ha Mendipathar, North Garo Hills.
Kane ka bottling plant jong ka Varun Beveragers Limited (PepsiCo) ka dei kaba la shna ha ka jaka bah eh 37 acre ha Mendipathar Industrial Area bad ka jingpynlut pisa ba kot T.340 klur.
“Kane ka project ka dei ka jingkyrkhu ïa ka Jylla jong ngi, namar ka plie ïa ka lad ïohkam ïohjam bad ai jingmyntoi ïa ki briew jong ka thaiñ ha kiba bun ki liang” ong u Myntri Rangbah bad bynrap “Kane ka dei ka dak ka jingkiew ka ïoh ka kot ba ka Meghalaya kala don ha ka lynti kaba dei ban kynjoh ïa ka thong. Ym ju don ba poi pyrkhat ba ka bottling plant kaba heh duh kan wan ha Mendipathar”.
U Myntri Rangbah ula ïathuh ruh ba ka project ba heh kat kane ha Ri-lum Garo, kan nang kyntiew ïa ka jingangnud jong ki samla. “Ki samla kin sa ïohi ïa ki kabu ba kane ka plant kan plielad ïa ki. Ngi lah ban antad ba ki lad bapher bapher kin sa wan hapoh ka thaiñ”.
U Myntri Rangbah ula pynpaw ba ka Mendipathar Industrial Area ka dei kaba la wanrah naduh ki snem 1990 hynrei la palat 30 snem, ym shym la don satia kiba seng kam. “Ha kine ki 30 snem bala leit, ym don satia ki karkhana kiban wan. Kila don ki jingkyrmen bad jingkhmih lynti, ki bym shym la urlong satia” ula ong haba pynpaw ïa ka jingsngewkhia jong u (L) PA Sangma, uba ïohi ïa ka Mendipathar kum ka engine ka roi ka par jong ka Ri-lum Garo.
“Mynta ka sngi ka dei ka sngi jong ka jingkyrmen bad ka jingpynurlong ïa ka jingïohi jngai ba u (PA Sangma) u don na ka bynta ka Mendipathar bad ka Jylla baroh kawei” bynrap u Myntri Rangbah.
Ula ai jingithuh ïa ka jingsynñiang jong ki Nokma bad ki paidbah ka Mendipathar ha kaban ai ïa ka jaka ban seng ïa ka Industrial area ha ki 30 snem bala leit noh.
Kane ka bottling plant an aikam kumba 500 ngut ki nongtrei ki ban pynmih bad sam ïa ki mar PepsiCo, kynthup ki umsoh bapher bapher.
U Myntri Rangbah ula kyntu ïa ki paidbah ba kin shim kabu ïa ki kam ba ïadei bad ka ïoh ka kot bad pynbna ruh ba sa kawei ka plant kan sa mih ha ka thaiñ Tikrikilla Bajengdoba, ha kaba 90% ki kam kila dep mynta.
Ha kane ka sngi la iadonlang u Symbud Lamphang ka jylla u Timothy D Shira, u Myntri kam bording AT Mondal, u Myntri ka PHE Marcuise Marak, Chairman ka MIDC James K Sangma bad kiwei kiwei ki MLA.
U Myntri Rangbah ula ai khublei ruh ïa u Chairman ka Varun Beverages Limited, Ravikant Jaipuria bad u Varun Jaipuria, halor ka jingseng ïa ka bottling plant kaba hehduh ha ka thaiñ Shatei Lam Mihngi ka Ri.