Shillong, Naitung, 27: U Myntri Rangbah ka Jylla u Conrad Sangma ha ka sngi Balang u la plie paidbah ïa ka National Workshop ba ar sngi halor ka phang, ‘Translating Vision into Action NEP 2022: An Implementation Perspective’, ïa kaba la pynlong da ka Internal Quality Assurance Cell, Shillong College.
Ha kane ka sngi la sakhi lang da u Myntri ka tnat Pule Puthi u Bah Lahmen Rymbui bad u Additional Chief Secretary u Bah Donald P. Wahlang.
U Myntri Rangbah haba kren kum u Kongsan u la ong ba jingïathir ïatai halor ka New Education Policy kan wanrah ïa ka jingmyntoi. U la ong ba ka jingpyntreikam ïa ka New Education Policy kan kham bam por bad ka donkam ïa ka jingtrei shitom bad ka jingïatreilang na baroh ki liang.
U la ong ba ka jingpyntreikam ïa kiei kiei ki jingthmu ba thymmai ki kham shipor ba yn ym lah ban khmihlynti ban shu pynurlong noh mardor namarba ki don ki bynta kiba ka sorkar ka hap ban shong pyrkhat sani bha khnang ban pynmyntoi hi ïa ka imlang ka sahlang khnang ban wanrah ïa ki jingkylla.
U la bynrap ba ka Education Policy kaba mynta ka kham kdew hapoh ka jingwad bniah, ka jinghikai pyntbit, ka sengkam sengkam, ka sports bad kiwei kiwei de ki jinghikai ki ban pynmyntoi ïa ki samla pule ha kaba ha ka pule puthi kaba mynshwa ym shym la pynrung satia kum ïa kine ki jait jinghikai.
Shuh shuh u la ong ba kane ka jingïathir ïatai kaba ar sngi kan long kum ka jingpynkhreh lypa ïa ka lynti na ka bynta ban pyntreikam ïa ka NEP ym tang ha Shillong College hynrei ha kiwei kiwei pat ki College kiba don hapoh ka jylla khnang ban dup kynjoh sha ka thong kaba la buh hakhmat da kane ka polisi.
Hadien kane, u Myntri Rangbah u la plie paidbah ïa ka iing building ba thymmai, ïa ka College Auditorium bad ïa ka Lift ba la bei pisa lyngba ka RUSA.
