Nongpoh, Naiwieng, 11: U Myntri rangbah ka jylla u Conrad K. Sangma ha ryngkat ka jingdon lang u Myntri ba dei peit ïa ka tnad C&RD bad uba dei ruh u MLA ka Jirang u Bah Sosthenes Sohtun kum u symbut kongsan mynta ka sngi u la leit ban plie paidbah ïa ki Kamra Klas ba thymmai ka Ri Bhoi Synod College kaba don ha Umsaitsning, ha kaba la shna da ka jingïarap ka sorkar lyngba ka Skhim Chief Minister Special Development Fund (CMSDF) ha ka jinglut kaba la kot sha ka T. 26,72,000.
Kiwei kiwei kiba la ïa don lang ban sakhi ha kane ka sngi ki kynthup ïa u MLA ka Umsning u Dr. Celestine Lyngdoh, u MLA ka Nongpoh u Bah Mayral Born Syiem, u MLA ka Mawhati u Bah Charles Marngar, u Rev. Precious Timung, Principal ka Ri Bhoi Synod College, ki nonghikai, ki samla pule bad kiwei kiwei de.
Haba phai dien, kane ka Ri Bhoi Synod College la seng dang ha u snem 2017 da ka jingthmu ban kyntiew ïa ka pule ka puthi bad ka jingnang jingstad ha them Ri Bhoi, hynrei ka long ka jingkyrmen ba tang ha ki khyndiat snem kane ka College ka la dang kiew shaphrang ban kyntiew ïa ka pule ka puthi ym tangha ka thain Umsning bad ha ka District Ri Bhoi hi baroh kawei.
Kane ka sngi ka long ruh ka sngi kaba dap da ka jingkmen ïa ki bor pynïaid jong ka Ri Bhoi Synod College, ha kaba ki la phah ïa ka dorkhas sha u Myntri Rangbah ka jylla ban ïarap na ka bynta ban tei ïa ka Auditorium Hall bad ki tiar put ki tiar tem ba u Myntri Rangbah ka jylla u la kular ban pynurlong ïa kitei ki jingdonkam hapoh kane ka College.
Haba kren kum u kongsan ha kane ka sngi, u Conrad K. Sangma kum myntri rangbah ka jylla, u la ai ka jingïaroh kaba khraw ïa ki bor pynïaid ka Ri Bhoi Synod College kiba la len lade ban seng ïa kane ka College ka ban long kum kawei na ka shlem ai jingnang jingstad ïa ki samla bad dei lyngba ka jingiohi jngai jongki, kane ka College ka la ieng rasong na ka bynta ban ai jingnang jingstad ym tang ïa ki Samla ka thaiñ Umsning bad ïa ki samla jong ka District bad ka jylla hi baroh kawei.
Shuh shuh, u Myntri rangbah nalor ba u la kular ban shim khia ban pynioh ïa ka Auditorium Hall bad ki tiar put ki tiar tem ba donkam kane ka College, u la kular ruh ïa ki bor pynïaid ka College ba un dang shim khia ban wan rah shuh kiwei kiwei ki jingdonkam hapoh kane ka College khnang ba kane ka College kan long kawei na ka College kaba bha tam ban ai jingnang jingstad ïa ki samla pule ka district bad ka jylla hi baroh kawei.
La jingkren ruh ha kane ka sngi naduh u Bah Sosthenes Sohtun kum u myntri sorkar bad Dr. Celestine Lyngdoh kum u MLA ka Umsning, ha kaba kum ki nongmihkhmat na Ri Bhoi, ki la ai ka jingïaroh kaba khraw ïa u Myntri rangbah ka jylla, ha kaba ha ka jingïalam jong u kum u nongïalam shibun ki kam pynroi ki la wan poi ha ka jylla naduh ki lynti ki synkien, ka pule ka puthi, ka koit ka khiah bad kiwei wei de ki kam pynroi kiba dei katkum ka jingdonkam jong u paidbah ha ka jylla.
