Shillong, Nohprah 07: U Myntri Rangbah Duh, Narendra Modi u la plié paidbah ïa ka Ashtalakshmi Mahotsav ha ka Bharat Mandapam ha New Delhi mynta ka sngi. Ha ka jingpdiang ïa baroh ki kynrem ki lyndan ha kane ka jaka, u Modi u la ong ba ka dei ka Mahaparinirvana Divas jong u Babasaheb Dr B R Ambedkar.
U la ong ba ka Riti Synshar kaba la thoh da u BabasahebAmbedkar, kaba la dap 75 snem, ka dei kaba ai mynsiem ia baroh ki briew jong ka ri. U Modi u la ai jingsngewnguh ïa u Babasaheb Ambedkar na ka liang jong baroh ki briew jong ka ri India.
U Modi u la ong ba ka Bharat Mandapam ka la sakhi ïa ki prokram bapher bapher jong ka ri bad ki prokram ba la wan ïashim bynta ki briew na kiwei kiwei ki ri ha kine ki ar snem ba kynthup ïa ka jingpynlong ïa ka jingïalang G20. U Modi u la ong ba ka prokram mynta ka sngi ka dei kaba kham kyrpang. U la ong ba kane ka prokram ka la pyniphuh iphieng ïa baroh kawei ka Delhi da ki dak jong ka thaiñ shatei lammihngi. Da kaba kdew ba kane ka tamasa kan long ha kine ki lai sngi, u Modi u la ong ba kane ka prokram kan pyni ïa ki lad kiba don ha ka thaiñ shatei lammihngi ïa ka ri bad ka pyrthei.
U la ong ba kane ka prokram kan sakhi ïa ki jingïakut ha ki kam khaiï pateng bad kan pyni ruh ïa ki mar na ka thaiñ shatei lammihngi ha ryngkat ka deiriti, ki jingbam bad kiwei kiwei ki bynta ba itynnad. U la ong ruh ba kane ka prokram kan ai mynsiem ïa ki briew na ki jingjop jong ki briew ba kynthup ïa kito kiba la jop khusnam Padma ki ba ïadon lang ha kane ka jaka.
U Modi u la ong ba kane ka dei ka prokram kaba kyrpang bad kaba nyngkong da kaba bynrap ba kane ka prokram kan plié ïa ki lad ban bei tyngka shibun ha ka thaiñ shatei lammihngi. U la ong ruh ba kane ka dei ka lad kaba biang bha ïa ki nongrep, ki nongtrei bad ki nongsaiñ dur ha ryngkat ki nongbei tyngka na kylleng ka pyrthei. Da kaba ong ba ka exhibition ha kane ka jaka ka pyni ïa ka jingïar bad ki lad kiba don ha ka thaiñ shatei lammihngi, u Modi u la kitbok kitrwiang ïa ki nongpynïaid ïa ka Ashtalakshmi Mahotsav, ki briew na ka thaiñ shatei lammihngi bad ki nongbei tyngka.
U Myntri Rangbah Duh u la ong ba ha kine ki 100 haduh 200 snem ba la dep, baroh ki la sakhi ïa ka jingkiew ka thaiñ sepngi jong ka pyrthei bad ba kane ka thain ka la don ka bor ha ka pyrthei ha baroh ki kam – ka ïoh ka kot, ka imlang sahlang, ka kam saiñ pyrthei. U la ong ba ka India ruh ka la mad ïa kane ka bor jong ka thaiñ sepngi. U la ong ba hadien kane ka juk jong ka bor jong ka thaiñ sepngi, ki spah snem ba 21 ki dei jong ka thaiñ mihngi kaba mut ka Asia bad ka India. U Modi u la ong ba u ngeit skhem ba ha kine ki por ban wan, ka roi ka par jong ka India ka dei ka ban wan na ka thaiñ mihngi bad khamtam ka thaiñ shatei lammihngi.
U la ong ba ha kine ki phew snem ba la dep, ka India ka la sah ïa ka jingmih ki nongbah ba heh kum ka Mumbai, Ahmedabad, Delhi, Chennai, Bengaluru, Hyderabad. U Modi u la ong ba ha kine ki phew snem ban wan ka India kan sa ïohi ïa ki lad ba thymmai na ki nongbah kum ka Guwahati, Agartala, Imphal, Itanagar, Gangtok, Kohima, Shillong bad Aizawl bad ki prokram kum ka Ashtalakshmi kin don ka bynta kaba heh ha kane.
Ha kaba ïadei bad ka tynrai jong ka India, u Myntri Rangbah Duh u la ong ba ka Blei Lakshmi ka dei ka Blei jong ka jingkmen, ka koit ka khiah bad ka jingriewspah. Da kaba kdew sha ki phra bynta jong ka Blei Lakshmi, u la ong ba la mane ïa baroh phra bynta jong ka haba mane ïa ka Blei Lakshmi. Ha kajuh ka rukom, u Modi u la ong ba ka Ashtalakshmi jong ki phra tylli ki jylla ki don ha ka thaiñ shatei lammihngi kiba long ka Assam, Arunachal Pradesh, Manipur, Meghalaya, Mizoram, Nagaland, Tripura bad Sikkim.
U la ong ba ki phra bynta ka Asthalakshmi ki don ha kine ki phra tylli ki jylla jong ka thaiñ shatei lammihngi. Da kaba ong ba ka bynta kaba nyngkong ka dei ka Adi Lakshmi, u Modi u la ong ba ka deiriti Adi ka khlaiñ bha ha man ka jylla jong ka thaiñ shatei lammihngi. Da kaba ong ba man ka jylla jong ka thaiñ shatei lammihngi ka rakhe ïa la ka jong ka deiriti, u Myntri Rangbah Duh u la kdew ïa ka Cherry Blossom Festival jong ka Meghalaya, Hornbill Festival jong ka Nagaland, Orange Festival jong ka Arunachal, Chapchar Kut Festival jong ka Mizoram, Bihu jong ka Assam, ka jingshad Manipuri bad u la ong ba ka deiriti ka long kaba ïar ha ka thaiñ shatei lammihngi.
Ha kaba ïadei ba ka bynta kaba ar jong ka Blei Lakshmi – Dhan Lakshmi, u Myntri Rangbah Duh u la ong ba la kyrkhu ïa ka thaiñ shatei lammihngi lyngba ka jingbun ki jingdon jingem ba ai ka mariang ha kaba bun ki mar poh khyndew, ka umphniang, ki kper slasha bad ka jingriewspah na ka mariang. U la ong ba la lad ka long kaba heh ha ka bording kaba pynmih na ki tyllong ba lah ban pynthymmai bad ba ka jingkynkhu jong ka “Dhan Lakshmi” ka dei ka spah bah jong baroh kawei ka thaiñ shatei lammihngi.
Ha kaba ïadei bad ka bynta kaba lai jong ka Blei Lakshmi – u Modi u la ong ba ka Dhanya Lakshmi ka la ïarap bha ïa ka thaiñ shatei lammihngi bad u la ong ba kane ka thaiñ ka pawnam na ka bynta ka rukom rep tynrai, ka rep organic bad ki millets. U la ong ba ka India ka sngew sarong shaphang ka Sikkim kaba dei ka jylla kaba rep organic pura.U Modi u la ong ba u khaw, ki siej, ki musli musla bad ki dawai kynbat kiba mih ha ka thaiñ shatei lammihngi ki dei ka dak jong ka bor jong ka kam rep ha kane ka thaiñ.
U la ong ruh ba ka thaiñ shatei lammihngi ka don ka bynta kaba heh ha ki jingpynbeit ba ka India ka kwah ban ai ïa ka pyrthei kiba ïadei bad ka rukom im kaba koit ba khiah bad ka jingïoh ïa ka bam kaba tei.
Ha kaba ïadei bad ka bynta kaba saw jong ka Asthalakshmi – Gaja Lakshmi, u Modi u la ong ba ka BleiGaja Lakshmi ka shong ha u tiew lotus bad la ker pyllun ïa ka da ki hati. U la ong ba ka thaiñ shatei lammihngi ka dei kaba dang rben ki khlaw, ka don ki jaka kum ka Kaziranga, Manas-Mehao bad kiwei kiwei ki jaka kyrpang na ka bynta ki mrad. U la ong ruh ba ki don ki krem bad ki jaka shongum kiba itynnad bha. U Modi u la ong ba ki jingkyrkhu jong ka Gajalakshmi ki don ka bor ban pynkylla ïa ka thaiñ shatei lammihngi sha ka jaka jngohkai kaba biang tam ha ka pyrthei.
U Myntri Rangbah Duh u la ong ba ka thaiñ shatei lammihngi ka pawnam namar ka jingsaiñdur bad ka jingtbit kaba long ka dak jong ka bynta kaba san jong ka Asthalakshmi – Santan Lakshmi, kaba mut ka jingseisoh bad ka jingsaiñdur. U la kdew sha ka jingtbit ban pynmih ïa ki jaiñ kum ka Muga Silk jong ka Assam, Moirang Phi jong ka Manipur, Wankhei Phi, Chakheshang Shawl jong ka Nagaland kiba baroh ki itynnad. U la ong ruh ba ki donm shibun ki mar kiba la ïoh ïa ka jingithuh GI tagging kiba long ka dak jong ka jingshna tiar bad ka jingsaiñdur ha ka thaiñ shatei lammihngi.
Ha kaba ïadei bad ka bynta kaba hynriew jong ka Lakshmi – Veer Lakshmi kaba dei ka dak jong ka jingïasoh ka jingshlur bad ka bor, u Modi u la ong ba ka thaiñ shatei lammihngi ka dei ka dak jong ka bor ki longkmie. U la ai nuksa da ka kam NupiLan jong ka Manipur kaba pyni ïa ka bor jong ki longkmie. U Modi u la ong ba ka rukom kren pyrshah ka thaiñ shatei lammihngi ïa ka jingdon mraw ka dei ka ban don jingkynmaw beit ha ka histori jong ka India.
U la ong ba ki longkmie kiba shlur ha ki khanatang bad ruh ki nongïakhih na ka bynta ka jinglaitluid ka ri kum ka Gaidinliu, KanakalataBarua, Rani Indira Devi, LalnuRopiliani ki la ai mynsiem ïa baroh kawei ka ri. U Modi u la ong ba wat mynta ruh, ki khun kynthei na ka thaiñ shatei lammihngi ki pynkhlaiñ ïa kane. U la ong ba ka jingseng kam lajong da ki longkmie na ka thaiñ shatei lammihngi ka la aibor ïa baroh kawei ka thaiñ bad ba ym pat ju ïohi ïa kum kane.
Ha kaba ïadei bad ka Lakshmi ba hynñiew jong ka Ashtalakshmi – Jai Lakshmi u la ong ba kane ka mut kata kaba ai ïa ka jingpawnam bad ka jingkhraw. U Myntri Rangbah Duh u la ong ba mynta ka thaiñ shatei lammihngi ka don ka bynta kaba heh ha ki jingangnud jong baroh kawei ka pyrthei na ka bynta ka India. U la ong ba katba ka India ka dang peit ïa ka jingpynïasoh bad ka pyrthei ha kaba ïadei bad ka deiriti bad ka khaiï pateng jong ka, ka thaiñ shatei lammihngi ka dei kaba pynïasoh ïa ka India bad ki lad kiba bun ha ka thaiñ South Asia bad East Asia.
Ha kaba ïadei bad ka Lakshmi kaba phra jong ka Ashtalakshmi – Vidya Lakshmi, u la ong ba kane ka dei ka dak jong ka jingnang jingstad bad ka pule puthi. U Modi u la ong ba ki bun ki jaka Pdeng jong ka pule puthi ha ka jingtei ïa ka India kaba mynta kiba don ha ka thaiñ shatei lammihngi kum ka IIT Guwahati, NIT Silchar, NIT Meghalaya, NIT Agartala, bad IIM Shillong.
U la ong ba ka thaiñ shatei lammihngi ka la ïoh ïa ka AIIMS ba nyngkong jong ka bad ba ka National Sports University kaba nyngkong jong ka ri ka dei kaba dang shna ha Manipur. U la ong ba ka thaiñ shatei lammihngi ka la ai sha ka ri shibun ki nongïalehkai kiba tbit kum ka Mary Kom, BaichungBhutia, Mirabai Chanu, Lovelina, Sarita Devi. U Modi u la ong ba mynta, ka thaiñ shatei lammihngi ka la sdang ban khih sha ki startup kiba ïadei bad ka teknoloji, ki service centre bad ki karkhana kum ki semiconductor ha kaba da ki hajar ngut ki samla ki trei ha kine ki kam. U la ong ba kane ka thaiñ ka dang kylla sha ka jaka Pdeng jong ka pule puthi bad ka sap na ka bynta ki samla.
“Ka Ashtalakshmi Mahotsav ka dei ka jingrakhe jong ka lawei kaba kham bha jong ka thaiñ shatei lammihngi,” la ong u Myntri Rangbah Duh. U la ong ba ka dei ka jingrakhe ïa ka juk kaba thymmai jong ka roi ka par ka ban ïarap ïa ka jingthmu Viksit Bharat. U Modi u la ong ba mynta ka don ka jingshitrhem ban bei tyngka ha ka thaiñ shatei lammihngi bad ha kine ki shiphew snem ba la dep, baroh ki la sakhi ïa ka jingïaid lynti ka thaiñ shatei lammihngi sha ka roi ka par. Da kaba ong ba kane ka jingïaid lynti kam dei kaba suk, u Modi u la ong ba ka Sorkar Pdeng ka la leh katba lah ban pynïasoh ïa ki jylla ka thaiñ shatei lammihngi bad ka roi ka par jong ka India. U la ong ba ka roi ka par jong ka thaiñ ka long kaba suki hapoh ki Sorkar ba rim namar ka jingduna ki seat bad ki vote da kaba bynrap ba ka dei ka Sorkar u Atal Bihari Vajpayee kaba la sdang ïa ka tnad Sorkar ba kyrpang na ka bynta ka roi ka par jong ka thaiñ shatei lammihngi.
Ha ka jingban jur ba ha ki shiphew snem ba la leit, ka Sorkar India ka la trei borbah ban pynduna ka jingjngai hapdeng ka Delhi bad ki briew jong ka thaiñ shatei lammihngi, u Modi u la ong ba ki Myntri sorkar pdeng ki la wan jngoh ïa ki jylla ka thaiñ shatei lammihngi palat 700 sien bad ki la pynlut por kham bun bad ki briew jong ka thaiñ kaba la wanrah ka jingsngewjan hapdeng ka sorkar bad ka thaiñ shatei lammihngi bad ka roi ka par jong ka. U la ong kane ka la pynsted ïa ka roi ka par ha ka thaiñ.
Haba kren shaphang ka polisi ha ki snem 1990 ban pynsted ïa ka roi ka par ha ka thaiñ shatei lammihngi, ha kaba palat 50 tylli ki tnad sorkar pdeng ki la hap ban bei tyngka 10 percent na ka mang tyngka jong ki ha ka thaiñ shatei lammmihngi, u Modi u la ong ba ka sorkar jong u ka la ai kham bun ki grant ha ki 10 snem ba la leit haba ïa nujor naduh ki snem 1990. U la bynrap ba tang ha ki shiphew snem ba la leit, la pynlut palat T. 5 lak klur ha ka thaiñ shatei lammihngi hapoh ka skhim ba la kdew haneng kaba pyni ïa ka jingphai khmat kyrpang kane ka sorkar ba mynta sha ka thaiñ shatei lammihngi.
U Myntri Rangbah duh u la ong ba ka sorkar ka la sdang bun ki skhim ba kyrpang na ka bynta ka thaiñ shatei lammihngi kum ka PM-DevINE, Special Infrastructure Development Scheme bad ka North East Venture Fund. U la bynrap ba kine ki skhim ki la plie shibun ki lad ïoh kam. U Modi u la ong ba ka sorkar ka la sdang ruh ïa ka skhim Unnati ban kyntiew ïa ki kam karkhana ha ka thaiñ shatei lammihngi. U la ong haba ka don ka lad kaba bit ba biang ïa ki karkhana ba thymmai, ki plie ruh ïa ki lad ïoh ba thymmai. Haba kren shaphang ka kam semiconductor kadei kaba thymmai ïa ka India, u Modi u la ong ba ka Sorkar ka la jied ïa ka Assam ban pynïaid shaphrang ïa kane ka kam ba thymmai.
U la bynrap haba kum kine ki karkhana ba thymmai la plie ha ka thaiñ shateilammihngi, ki nongbei tyngka na ka ri bad kylleng ka pyrthei ki phaikhmat sha ki kabu ba thymmai ba don hangta.
“Ngi dang pynïasoh ïa ka thaiñ shatei lammihngi bad ka jingsngew, ka ïoh ka kot bad ka jingïadei bad ka mariang”, la ong u Modi. U la bynrap ba ka sorkar ym tangba ka tei ïa ki jingdon jingem ha ka thaiñ shatei lammihngi, hynrei ka buh ruh ïa ka nongrim kaba khlaiñ na ka bynta ka lawei. Ha ka jingkren shaphang ka jingeh kaba khraw ïa ka thaiñ shatei lammihngi kadei ka lad ka leit ka wan ha ki phew snem ba la leit na ka jingduna ki lad ka leit ka wan lyngba ki rel sha kiba bun ki jylla, u Modi u la ong ba ka sorkar jong ki ka phaikhmat shibun sha ki jingdon jingem ha ka imlang sahlang hadien u snem 2014.
U la bynrap ba kane ka la ïalam sha ka jingkiew kaba khraw ha ki jingdon jingem bad ka jingim jong ki briew ha ka thaiñ shatei lammihngi. U Modi u la ong ba ka sorkar ka la pynsted ruh ka jingpyntreikam ïa ki projek ba la sahteng da ki snem. U la kdew katto katne ki nuksa kum ka jingkieng Bogi-Beel. U Modi u la ong ba mynta ka jingïaid lynti hapdeng ka Dhemaji bad Dibrugarh ka long tang shi lane ar kynta, haba ïanujor bad ka jingïaid lynti kaba baroh shi sngi ha shuwa ban pyndep ïa ka jingkieng Bogi-Beel kaba la sahteng la slem bah.
“Kumba 5 hajar kilometre ki projek surok bah la lah ban pyndep ha ki shiphew snem ba la leit,” la ong u Modi. U la bynrap ba ki projek kum ka Sela tunnel ha Arunachal Pradesh, ka India-Myanmar-Thailand trilateral highway, ki surok thaiñ khappud ha Nagaland, Manipur bad Mizoram ki la pynkhlaiñ ïa ki lad ka leit ka wan. Haba kynmaw ba ka India ka la pyni ïa ka jingangnud ïa ka India-Middle East-Europe Corridor (I-MAC) sha ka pyrthei ha ka G-20 ha u snem ba ladep, u Modi u la ong ba ka IMAC kan pynïasoh ïa ka thaiñ shatei lammihngi jong ka India bad ka pyrthei.
Haba kren shaphang ka jingpynïasoh lynti rel ha ka thaiñ shatei lammihngi kaba la kiew shibun shah, u Myntri Rangbah duh u la ong ba ka kam ban pynïasoh ïa baroh ki nongbah jong ki jylla ka thaiñ shatei lammihngi da ka lynti rel ka la jan dep. U la bynrap ba ka rel Vande Bharat kaba nyngkong ka la sdang ka jingtreikam jong ka ha ka thaiñ shatei lammihngi. U Modi u la ong ba ha ki shiphew snem ba la leit, ka jingdon ki kad liengsuiñ bad ki liengsuiñ ha ka thaiñ shatei lammihngi ka la long arshah.
U la bynrap ba ka kam ka dang ïaid shakhmat ban shna ïa ki lad ka leit ka wan lyngba ki wah Brahmaputra bad Barak bad la kyntiew ruh ïa ki lad ka leit ka wan na kad lieng Sabroom.
Ha ka jingkren shaphang ka jingïaid shaphrang ka jingpynïasoh mobile bad gas pipeline, u Modi u la ong ba man ka jylla jong ka thaiñ shatei lammihngi la pynïasoh bad ka North East Gas Grid bad ladep buh gas pipeline palat 1600 km ka jingjrong. U la bynrap ruh ba ka Sorkar ka la phaikhmat ban pynïasoh internet bad palat 2600 tylli ki mobile tower ba la buh ha ki jylla jong ka thaiñ shatei lammihngi.
U la ong shuh shuh ba palat 13 hajar kilometre u optical fiber ladep buh ha ka jylla ka thaiñ shatei lammihngi. U Modi u la sngewkmen ba ka jingpynïasoh 5G ka la poi sha baroh ki jylla ka thaiñ shatei lammihngi.
Haba kren shaphang ka kam ba la leh ha kaba ïadei bad ki jingdon jingem ha ka imlang sahlang ha ka thaiñ shatei lammihngi, u Myntri Rangbah duh u la ong ba la pynheh ïa ki Medical College nalor ka jingshna ïa ki jingdonkam katkum ka juk mynta ban sumar ïa ki jingpang kum ka cancer. U la bynrap ba hapoh ka Ayushman Bharat Yojana, da ki lak ngut ki nongpang ha ka thaiñ shateilammihngi ki la ïoh jingsumar ei. U Modi u la ban jur ba ka sorkar ka la pyntreikam ïa ka AyushmanVayaVandana Card, kaba pynthikna ka jingïoh jingsumar ei ïa ki nongshong shnong kiba la don 70 snem shaneng.
U Modi u la ong ba nalor ki lad jingpynïasoh ha ka thaiñ shatei lammihngi, ka sorkar ka la ban jur halor ka dustur tynrai jong ka, ki kam ba ïadei bad ki jaiñ bad ki kam jngohkai. U la bynrap ba ka jingmyntoi jong kane ka long ba ki briew mynta ki bun ba mih shakhmat ban wan jngoh ïa ka thaiñ shatei lammihngi. U la bynrap ba ka jingdon ki briew kiba leitjngoh ïa ka thaiñ shatei lammihngi ka la kiew jan arshah ha ki shiphew snem ba la leit. U Modi u la ong ba ka la don ka jingkiew ha ki kam khaiï pateng ba thymmai bad ki lad ïoh kam namar ka jingkiew ka jingbei tyngka bad ka kam jngohkai.
U Myntri Rangbah duh u la ban jur ba ki samla jong ki jylla Ashtalakshmi ki long kiba kyrpang ïa ka Sorkar India bad ki kwah ïa ka roi ka par. Haba ban jur ba ka don ka jingkyrshan jong ki briew na ka bynta ka shongsuk shongsaiñ kaba pura ba la ïohi ha man ka jylla jong ka thaiñ shatei lammihngi ha ki shiphew snem ba la leit, u Modi u la ong dei namar ki sienjam jong ka sorkar pdeng bad ki sorkar jylla, da ki hajar ngut ki samla ki la iehnoh ïa ka lynti jong ka jingïaumsnam bad pdiang ïa ka lynti ba thymmai jong ka roi ka par.
U la bynrap ba ha ki shiphew snem ba la leit, la ïasoi bun ki soskular ïasuk ha ka thaiñ shatei lammihngi bad la pynbeit ïa ki jingïakajia pud hapdeng ki jylla ha ka rukom kaba dei. U la ong, kane ka la pynduna shibun ïa ki jingjia ïa umsnam ha ka thaiñ shatei lammihngi. U la bynrap ruh ba la weng ïa ka AFSPA na bun ki district. U Modi u la ong ba baroh, ngi lah ban thoh ïa ka lawei ba thymmai na ka bynta ka Ashtalakshmi bad ka sorkar ka shim man ka sienjam na ka bynta kane.
U Myntri Rangbah duh u angnud ba ki mar na ka thaiñ shatei lammihngi ki dei ban poi sha man ki ïew jong ka pyrthei bad ha kaba ïadei bad kane la kyntiew ïa ki mar na man ki district hapoh ka campaign One District One Product.U la bynrap ba ki briew ki lah ban ïohi shibun ki mar na ka thaiñ shatei lammihngi ha ki exhibition ha ka ïew nongkyndong ha ka AshthaLakshmi Mahotsav. “Nga pynshlur ïa ka mantra jong ka Vocal For Local na ka bynta ki mar na ka thaiñ shatei lammihngi,” la ong u Modi. U la ong ba u pyrshang ban pyni ïa ki mar na ka thaiñ shatei lammihngi sha ki briew nabar ri bad kane kan ai jingithuh ïa ka kam saiñdur bad kam shna tiar ba itynnad jong ka thaiñ shatei lammihngi ha ki rynsan shabar ri. U Modi u la kyntu ïa ki briew jong ka ri ban kynthup ïa ki mar na ka thaiñ shatei lammihngi kum shi bynta ka rukom im jong ki.
U Modi u la khot sngewbha ïa ki briew ban ïashim bynta ha ka Madhavpur Mela ban long ha Porbandar, Gujarat. U la bynrap ba ka Madhavpur Mela ka long ka dak jong ka jingrakhe ïa ka jingkyntiew kurim u Blei Krishna bad ka Blei Rukmini, ka khun kynthei jong ka thaiñ shatei lammihngi. U la kyntu ïa baroh ki briew ha ka thaiñ shatei lammihngi ban ïasohlang bad ka Mela ha u 2025. Haba pynkutia ka jingkren jong u, u Modi u la pynpaw ka jingngeit skhem ba lyngba ki jingkyrkhu jong u Blei Krishna bad ka Ashtalakshmi, ka India kan sa sakhi ïa ka juk jong ka roi ka por ha ka thaiñ shateilammihngi ha kane ka spah snem ba 21.
U Myntri Sorkar pdeng ba dei khmih ïa ka Tnad Development of North Eastern Region, Jyotiraditya M. Scindia, u Myntri Rangbah ka jylla Assam, Himanta Biswa Sarma, u Myntri rangbah ka jylla Tripura, Dr.Manik Saha, u Myntri Rangbah ka jylla Meghalaya, Conrad Sangma, u Myntri Rangbah ka jylla Sikkim, Prem Singh Tamangbad u Myntri Khynnah jong ka Sorkar Pdeng ba dei khmih ïa ka Tnad Development of North Eastern Region Dr.SukantaMajumdar ki la ïadonlang ha kane ka jingïalang lem bad kiwei kiwei ki kynrem ki lyndan.
Ka Nongrim ka Ashtalakshmi Mahotsav ka dei ka tamasa kaba lai sngi kaba ïadei bad ka deiriti, ba la rakhe ha ka sien ba nyngkong naduh ka 6 haduh 8 tarik Nohprah ha Bharat Mandapamha New Delhi.Ka pyni ïa ka jingïar ka deiriti jong ka thaiñ shatei lammihngi, kaba wanrah lang ïa ki rukom saiñdur, ka jingshna ki tiar tynrai bad ka deiriti.
Ban kyntiew ïa ki lad ka ïoh ka kot ha ki bynta kum ka jingshna tiar tynrai, ka jingthaiñ jaiñ, ki mar rep, bad ka kam jngohkai, ka Mahotsav ka don ki prokram bapher bapher. Ka tamasa ka don ruh ki jingpyni ïa ki kam jong ki nongsaiñdur, ki Grameenhaat, ki jingïalang teknikal halor ki bynta ba kongsan ba ïadei bad ka roi ka par jong ka thaiñ shatei lammihngi. Ki prokram ba kongsan ki kynthup ka jingïalang jong ki nongbei tyngka bad ka jingïalang jong ki nongthied bad ki nongdie ba la saiñdur ban long ka kabu kaba kyrpang ban tei bad pynkhlaiñ ïa ki rukom treikam, ki jingïatreilang bad ki sienjam ban kyntiew ïa ka ïoh ka kot jong ka thaiñ.
Ha kane ka Mahotsav ka don ruh ka Design conclave bad ka Fashion show kaba pyni ïa ka kam shna jaiñ bad tiar tynrai jong ka thaiñ shatei lammihngi ha ka rynsan jong ka ri. Ha ka jingpyni ïa ka jingriewspah ka pateng deiriti jong ka thaiñ, ka tamasa kan don ruh ïa ka put ka tem bad ki jingbam tynrai jong ka thaiñ shatei lammihngi
