Plie u Myntri Rangbah ïa 2 tylli ki jingkieng ïaid kali ban suk ka leit ka wan ki paidbah

Shillong, Naitung 28: U Myntri Rangbah ka jylla u Conrad K Sangma u la plie ar tylli ki jingkieng ïaid kali ha North Garo Hills District, kawei na Chidaret bad pynïasoh sha Thapa Bazar bad kawei pat na Bajengdoba-Resubelpara kine ki ar tylli ki jingkieng kin ïarap ban pynsuk ïa ka leit ka wan ki paidbah ka thaiñ.
Haba kren ha kine ki ar tylli ki jaka u Myntri Rangbah ka jylla u la ong ba ka sorkar ka la phai khmat bha sha ki surok namar lyngba jong ka surok lah ban kyntiew ïa ka ïoh ka kot jong ki paidbah, la ong ba ka sorkar ka la pynlut T.5000/- klur tyngka ban shna ïa ki surok ha kylleng ka jylla.
Halor kane u Myntri Rangbah ka jylla u la ong ba lada ka jingtrei ki ïaid kumba ka long mynta ka jylla kan kynjoh sha ka $10 billion ha ka khaïi pateng ha shuwa ka snem 2028, kane ka dei ka thong kaba ka sorkar ka la buh ban kyntiew ïa ka jylla ha ka ïoh ka kot.
Shuh shuh u Myntri Rangbah ka jylla u la pyntip sha u la kyntu ïa ki paidbah ba ka Myntri Pla Tyngka ka sorkar pdeng ka Nirmala Sitharaman ha ka jingwan ha Shillong ka la ai ka jingïaroh ïa ka jingtrei kam ka sorkar Meghalaya ha ki kam pynroi.
Ka Myntri Pla Tyngka ka sorkar pdeng ka la ïa ka jingkren markhmat bad ki nongrep, ki khun samla bad bun kiwei kiwei ki kynhun ha kaba ka Myntri ka la leit ruh sha ki nongkyndong bad lap ba pyndep ïa ki kam pynroi kiba ka sorkar jylla ka la pyntrei bad ka la sdang da ka jingkmen ban ïohi ba ka jylla ka la pyntreikam bha ïa ki kam pynroi.
Ka Myntri ka la ïaroh ïa ka jingsdang ka jylla ban pynkhlaiñ ïa ki jingpynïasoh ïa ki surok, ka jingpynkupbor ïa ki self-help group (SHGs), ban pynkhlaiñ ïa ki jingtei ki kam jngohkai, bad ki kam khaïi ha ka rep ka riang kum ka Megha-LAMP programme.