Nongpoh, Jymmang 03: U Myntri Rangbah ka jylla u Conrad K Sangma mynta ka sngi u la leit ban plie ïa 2 tylli ki surok ha Lum Nongthymmai bad Lumnongrim Byrnihat kaba dei ka surok ba donkam jong ki paidbah ban pynïasoh sha ka PHC bad ka iew Byrnihat kaba don ha katei ka thaiñ bad kumjuh ruh ha katei ka sngi la ioh ruh ban buh ïa u mawnongrim ban tei ïaka Multi Facilitation Center.
Ïa kitei ki surok la mang pisa lyngba ka State Scheme haka jinglut kaba 1 klur naka bynta ka surok ha Lum Nongthymmai bad 90 lakh naka bynta ka surok ha Lumnongrim bad kumjuh ruh 60 lakh naka bynta ban tei ïaka Multi Facilitation Center ha Byrnihat lyngba ka tnad Urban Affairs.
Haba kren ha katei ka sngi naka liang u Conrad K Sangma u la pynpaw ka jingsngewkmen kaba khraw ban ioh ban plie ïaki kam pynroi haka thaiñ Byrnihat kaba dei ruh kawei naki constituency bala sdang ban kiew arsut naduh bala shimti da u Bah Sosthenes Sohtun kum u MLA u ba la trei shitom naka bynta ban wanrah ki kam pynroi ha katei ka thaiñ.
U la ai ruh ka jingïaroh ïa u MLA ka Jirang uba dei uwei naki MLA u ba sngewrit bad trei shitom ban wanrah ki kam pynroi ha katei ka thaiñ bad kumba long mynta ka Jirang kadei kawei naki constituency ha Ri-Bhoi kaba la ioh shibun ki kam pynroi naduh ki surok, ki jaka pule bad kiwei kiwei.U la ong ruh ba naka liang ka sorkar kala trei shitom ban wanrah shibun ki kam pynroi ha kine ki 4 snem bala leit noh bad ban dang pyndep shibun ki jingangnud.
La sakhi ruh ha katei ka sngi da ka jingdonlang u MDC ka Jirang Bah Victor Ranee, Joram Beda Secretary ka tnad Planning, Arpit Upadhyaya Deputy Commissioner ka Ri-Bhoi District, Giri Prasad SP Ri-Bhoi District, BDO ka Umling Bah R Nongrum bad kiwei kiwei.
