Plie u Myntri ia ka Adolescent Health Resource Centre ha Khliehriat Higher Secondary School

Khliehriat Iaiong 22: U Myntri ka sorkar jylla u bah Kyrmen Shylla hynnin ka sngi u la plie paidbah ïa ka Adolescent Health Resource Centre ha Khliehriat Higher Second-ary School bad kane ka long ka jingmyntoi ïa ki paidbah ka thaiñ na ka bynta ka bha ka miat ha ka im lang ka sah lang khamtam kane kan wanrah jingbha na ka bynta kito ki khynnah samla ban iarap ban pynsngewthuh halor ki jingeh ba mih na ka shongkha khynnah.
Haba kren kum u kong san, u bah Kyrmen Shylla, u la ong ba ka jingdon kane ka Centre ha Khliehriat kan iarap ïa kiba bun ki samla jong ka district, ha kaba ha kane ka Centre ki lah ban ïa phylliew jingmut halor kino kino ki jingeh ba ki ia kynduh namar hangne kin don ruh ki nong iasyllok ne ki coun cellor, u la ong ruh ba kane ka centre kan iarap ïa kito kiba ngop ha kiba bunjait ki jingdih bad jingbam ba sniew bad ha kane ka centre lah ban ioh ruh ïa ki jingpynshai bad ki jingiasyllok.
Haba kren shaphang ka AHRC, u Deputy Commissioner ka East Jaintia Hills District, u Abhilash Banarwal, IAS u la ban jur ba ki nongtrei jong kane ka centre ki donkam ruh ban bud dien bha khnang ban dup lah ban pynbeit (solve) ïa ki jingeh jong ki khun samla bad ka jinglah ban bud dien bad ka jinglah ban treikam ka dei ka thong jong kane ka Centre kaba la buh ha kane ka skul.
Na ka liang ka DEIC, ka Dr (Mrs) Handaka.L.Suting, ka la ong ba kane ka Adoles-cent Health Resource Centre, kan iarap ban pynduna ïa ka shongkha khynnah ne ka jingar met dang khynnah, kata 1% ha ka shi snem, kan iarap ha ka rukom ka bam ka dih kumba 3% ha ka shi snem, kumjuh ruh kane kan iarap ban ai ki jingpynsngew thuh halor ka jingdonkam ka koit ka khiah, kan iarap ban wanrah ïa ka bha ka miat ha ka im lang ka sah lang.
Ha kane ka prokram, ka kynhun jong ki khynnah kynthei ba la lam khmat da ka Dr Icilian Dkhar, ki la ïa shim bynta ha ka pledge kaba kren pyrshah halor ka jingar met dang khynnah, ka la don ruh ka jingiatai nia (debate).
Ha kane ka prokram, u Dr W.Bamon, u la pynsngew ruh ïa ki kaiphot shaphang ka RKSK prokram kaba la pynlong hapoh ka district.
U Project Officer AHANA East Jaiñtia Hills District, u Dr B.L.Kharmal-ki, u la kren halor ka phang “Sexual Health and issues affecting adolescents”
Kiba la ai jingkren ki kynthup ruh u DMHO East Jaintia Hills District, u Dr D.Shylla, Khliehriat,u Principal, Khliehirat Higher Secondary School, u Father Jose Josh bad ka kong Daphihi Passah, kaba dei ka RKSK Adolescent Counsel-lor, Khliehriat.