Nongstoiñ, Risaw 02 : Kum ka jingpynsah jingkynmaw ha kaba ïadei bad ka jingpynkup bor ïa ki jaitbynriew rit paid hapoh ka ri u Myntri Rangbahduh ka ri u Narendra Modi ha ka sngi Balang u la plie paidbah ïa ki sawphew tylli ki Eklavya Model Residential Schools ha ka nongbah Jharakhand ha kaba ka wei na kitei ki EMRS ka dei kaba don ha ka shnong Sohparu kaba hap ha ka Nongstoiñ C&RD Block West Khasi Hills District.
Ïa u maw nongrim na ka bynta ka EMRS ha shnong Sohparu la plie pyrda da u Bah Garod LSN Dykes Deputy Comissioner ka West Khasi hills ha ka jingïalang kaba la long ha TRYSEM Hall.
Ha katei ka jingplie ïa utei u mawnongrim la ïadon ryngkat da ki heh sorkar jong ka district ba kynthup ïa u Bikram Marak IPS Superintendent of Police ka West Khasi Hills nangta ki Ophisar na ka tnad ka pule puthi, u Bah Phyllasingh Syiem u Syiem ka Hima Nongstoiñ bad ki ophisar na ki tnad trei kam bapher bapher bad ruh ki riew rangbah na ki shnong ba pher bapher kiba la shah khot sngewbha ha katei ka sngi.
