Nongstoiñ, Nohprah 12: Ka jingplie ïa ki ïing kiba la dep tei hapoh ka Pradhan Mantri Awaas Yojana-Gramin (PMAY-G), ka la long kaba jop ha ka Shnong Mawphansyiar, ha kaba ka la long kum u mawjam u ba kongsan ha ka jingpyrshang jong ka sorkar, ban pynbiang ïa ki ïing kiba bit kiba biang na ka bynta ki nongshong shnong ha nongkyndong.
Ïa kane ka jingïalang la plie da u Remington Gabil Momin, MLA jong ka Rambrai-Jyrngam bad Chairman ka MMDC Ltd kum u Kongsan, ha ryngkat ka jingdon lang u bah V. Swer MCS, Project Director ka DRDA, West Khasi Hills District, kum u symbud kongsan, bah T.Diengngan BDO, kong I.Kharbani, Additional Project Ophisar, kong Larikynti Dkhar, Gram Sevak, Rangbah Shnong, VO, bad baroh kiba ïoh jingmyntoi na ka PMAY- G.
Ha ka jingkren, u Kongsan u Bah Remington Gabil Momin u la pynpaw ka jingsngewnguh ïa ka jingangnud jong ka sorkar ban pynkylla ïa ki ïing duk jong ki nongkyndong sha ki ïing kiba bit kiba biang. La ïoh ruh ban pule ïa ka jingkular Awaas Diwas, da kaba kyntu ïa baroh ban kyrshan ïa ka roi ka par ha ki liang baroh.
Ki la don haduh 20 tylli ki longïing kiba la ïoh jingmyntoi na kane ka skhim bad la aiti ruh ïa ki syrnot pyndep sha ki.
Ki nongshong shnong jong ka Mawphansyiar, ki pynpaw ka jingsngewnguh ïa baroh ki nongwan bad ki nongshim bynta na ka bynta ki jingnoh synniang jong ki ban pynlong ïa ka PMAY-G kaba jop ha ki dong ki thaiñ jong ki.
