Nongstoiñ, Nohprah, 14: “Ka kamram jong ki doctor, ki nurse bad baroh ki nontrei jong ka koit ka khiah ka dei ka kam Blei, ha kaba ka kamram jong ki ka long ban shakri ïa ki briew, khamtam ïa kiba pang ba shitom bad kiba donkam shisha ïa ka jingïarap”, ong u bah Macmillan Byrsat Chairman Meghalaya State Law Commission bad u Local MLA jong ka Nongstoiñ Constituency.
Ïa kine ki kyntien u la kren ha ka por ba plie ïa ka Mawlangkhar Sub Centre mynta ka sngi ka 14 tarik u Nohprah 2022 ha ka jing ïa don ryngkat lang jong u Deputy Commissioner, ki Sordar shnong, bad ki nongshong shnong jong ki 10 tylli ki shnong kiba hap hapoh kane ka Sub Center ha Mawlangkhar.
U la ong ba kane ka Sub Centre kan ai ka jingshakri ïa kiba pang ba shitom ïa ki 10 tylli ki shnong kiba hap hapoh ka West Khasi Hills District. U la kyntu ban shim ïa ki kabu bad baroh ki jingmyntoi da ka jingdon jong kane ka Sub Center, ban ïoh ïa baroh ki jingsumar na ka bynta ka koit ka khiah.
U la pynshlur ban leit kha ïa ki khunlung ha ki jaka sumar, khnang ban pynïoh ïa ki longkmie ba pun bad ki khunlung ïa ka jingsumar kaba paka. U la pynkut ïa ka jingkren da kaba ong ban kiar ïa ka jing armet khynnah.
Hadien kane, u kongsan bad kiwei kiwei ki heh ki haiñ ki la pynlong ruh ïa ka jingjurip ïa ka Sub-Centre kaba don ïa ka OPD section, Immunization, Labour Room bad Post Natal.
Kiwei kiba la ai jingkren ki long u Deputy Commis-sioner bah Garod L.S.N Dykes IAS Dr. S.A. Lyngdoh DMHO kaba la pynïaid ïa ka jingïalang, u Dr W.Sutnga ba la ai ïa ka jingkren pdiang bad batai ïa ki jingmyntoi ba la ai da ka Health Department, u bah P.L Marshillong Sordar ka shnong Mawlangkhar bad Dr. Lyngkhoi jong ka Markasa PHC ba la ai ïa ka jingkren khublei.
