Shillong, Nohprah 11 : U MLA ka Mylliem constituency ba dei ruh u Myntri ka tnad C&RD, Bah Hamlet Dohling u la plie bun ki jingtei kam pynroi mynta ka taiew kynthup naduh ka cummunity hall, ka jaka saitjain, ka auditorium bad ruh ban buh mawnongrim na bynta bun ki projek ban tei thymmai.
Ïa ka Cultural cum Community Hall ha Mylliem Syllai-ulor kaba shongdor 30 lak tyngka la plie ha ka 10 tarik mynta u bnai. Ha kane kajuh ka sngi la plie ruh ïa ka jaka saitjain ha Nongkseh-rim kaba la shna ha ka jinglut kaba 3.90 lak tyngka, nangta bad ka Auditorium jong ka Umlyngka Resources Mobilisation Development Society kaba shongdor 15lak tyngka kaba don ha Lumpongdeng, Umlyngka.
Nalorkine, u MLA u la ïoh ban plie ruh ïa u mawnongrim ban shna noh ïa ka Mylliem Pomkañiew Government LP School lem kumjuh ruh ïa ka Mylliem Government LP School.
Haba kren ha kitei ki jingïalang, u MLA u la ong ruh ba lyngba kitei ki projek kan wanrah ïa shibun ki jingmyntoi na ka bynta ka roi ka par hapoh ka constituency. U pynpaw ruh ka jingkyrmen ba kitei ki projek kin long ki jingkyrkhu ïa ki nongshong shnong hi baroh, ha kaba kin dang lah ban ïai kiew irat ha ki liang baroh, khamtam na ka bynta ki khynnah skul ka thain Mylliem hi baroh kawei.
