Jowai, Nohprah 13: U MLA ka 4 – Mowkaiaw Constituency ma Nujorki Sungoh mynta ka sngi ula plie ïa ka Barato Police Out Post ha West Jaiñtia Hills District, ha ka jingïadon lang ruh u Deputy Commissioner ka WJHD u bah B.S. Sohliya, u Superintendent of Police u Bikram D Marak, u MDC ka thaiñ u ma Aiborlang Shadap nalor ka jingwan sakhilang jong ki paidbah nongshong shnong.
U Superintendent of Police Bikram u D Marak, haba kren u la ong ba ka jingbuh ïa kane ka Police Out Post ha kane ka shong Barato kaba dei kawei kawei na ki shnong badon hajan ki jaka khappud khnang ba kan ai jingïarap ïa ki nongshong shnong ha kiba bun liang khamtam ha ka jingïada na ki kam sniem kam thiem bad kan ai jingshngaiñ ruh ïa ki briew haba don kum kane ka POP. Ula pyntip ba ki don kumba 21 tylli ki shnong kiba hap hapoh kane ka POP kaba kynthup ïa ka jngbun briew kaba 26 hajar ngut.
La ïathuh da u ma HT Wells Sten ba ïakane ka POP la angnud ban wanrah naduh ka snem 1994 hynrei hadien ka 28 snem kane kala wan ban urlong kum ka jingai Christmas sngewbha. Haka juh ka por u ai ka jingïaroh ïa Profitable Dkhar na ka shnong Barato iba la ai sngewbha ïa ka jaka sha ka tnad pulit kaba heh haduh 4.6 acre ban shna ïa kane ka POP.
U Deputy Commissioner u bah B.S Sohliya, haba ai jingkren ula ai jingïaroh ïa ka tnat kam pohïing kaba la lah ban wan rah ïa kane ka outpost ha kane ka shnong ïa kaba ka shnong ka la kyrmen ban ïoh la slem bha.
U Ma Nojorki u MLA ka thaiñ haba kren u pynpaw ka jingkmen kaba khraw haba u la ïoh ban plie ïa kane ka POP kaba ki paidbah kila khmilynti haduh mynta la 28 snem tam ei ei, da kaba u ong ba ka jingplie ïa kane ka POP kan wan rah shibun ki jingmyntoi ha ka jingïadei bad ka jingshongsuk shongsaiñ jong ki paidbah kumjuh ïa kito ki shnong kiba don hajan khappud.
Mynta ka sngi ïa ka jingïalang la pynïaid da ka Dy. SP (Crime) ka kong C.W. Lyngdoh, MPS bad la ïoh ruh ki jingkren na u Waheh Shnong Barato, ki jingkren na ki riew rangbah ka shnong Barato, ma Stelin Lamare nalor kiwei kiwei de.
