Nongpoh, Nailur 03: U MLA ka Umroi u Bah Damanbait Lamare mynta ka sngi u la leit ban plie paidbah ïa ka building skul ba thymmai jong ka Landmark Secondary School kaba don ha ka shnong Umroi Umdohbyrthih.
Ïa katei ka iing building ba thymmai jong ka Landmark Secondary School la mang pisa lyngba ka skhim SRWP ba la sakhi ruh da ka jingdonlang u Bah SB Blah i/c DSEO ka Ri-Bhoi District kum u symbud kongsan, Bah PB Sylliang Rangbah Shnong ka Umroi Umdohbyrthih, Bah Lambor Makri, Rangbah shnong Umroi Madan, u Bah Shalan Sylliang, President ka School Managing Committee, ki shipai ka Umroi Cantonment ki nonghikai, ki khynnah skul lem bad ki kmie ki kpa.
Haba kren ha katei ka sngi na ka liang u Bah Damanbait Lamare u la ong ba kum u MLA u la shimkhia ban pynmang skhim na ka bynta katei ka skul namar ka la donkam shisha ïa ka building kaba thymmai ba kin lait na ka jingshong khapngiah khamtam katei ka skul ka dei ruh kaba bun ki khynnah pule.
Na ka liang ki bor pynïaid skul, ki nongïalam shnong haba kren ha katei ka sngi ki la ai ka jingkhublei ba kyrpang ïa u MLA ka Umroi u ba la shimkhia ban pynioh ïa katei ka iing building kaba long shisha ka jingmyntoi kaba khraw namar ki khynnah ki donkam ïa ki kamra klas kiba biang ban lum ïa ka jingnang jingstad bad khamtam ban lait na ka sngi u slap.
