Nongstoiñ, Nohprah 09 : Ka jingkoit jingkhiah ka dei kaba kongsan tam ha ka jingim ba man la ka sngi, kumta na ka bynta ban pynsuk ïa ki paitbah, ka sorkar lyngba ka skhim kaba kyrpang kaba la tip kum ka Ayush Man Bharat, ka la bei pisa sha ka sorkar jylla ban shna ïa ki Sub Health Centre haman la ki jaka, khnang ba ki paitbah kin ïoh ïa ka jingsumar kaba biang ha ka por ba ki ïakynduh ïa ki jingpang jingshitom.
Kawei na ki Sub Health Centre kaba dang shu dep ban shna ka don ha ka shnong Nongriat West Khasi Hills, kaba la ïoh ban plie mynta ka sngi thohdieng ka 5 tarik Nohprah da u bah R.G.Momin MLA Rambrai Jyrngam constituency.
Ha katei ka sngi shuwa ban plie ïa katei ka jaka sumar, la pynlong ïa ka jingïalang ba lyngkot ha kaba la pynïaid da u bah Klishon Lyngkhoi. Ha katei ka jingïalang la ïadon lang da u bah Lurshai Kharbani MDC ka Rambrai Jyrngam, u Doktor Z.Marak Assistant District Medical & Health Officer ka West Khasi Hills, u Doktor jong ka Markasa PHC bad ki Nurse, ki ASHA ki rangbah shnong na ka thaiñ Nongriat bad ki paitbah shnong.
U bah B.Syiem sordar jong katei ka shnong haba ai jingkren, u la ong ba ki paitbah katei ka thaiñ ki la angnud la slem bah ban don ka jaka sumar ha katei ka shnong, hynrei ki la don bun ki jingpynwit kiba la pynsahteng ban ïoh ïa katei ka jaka sumar.
U la ong ruh ba wat hapdeng kiba bun ki jingeh ki paitbah ki la ïaishah haduh ba ka jingangnud jong ki la urlong mynta. U la ong ruh ba na ka liang ki paitbah ki la sngew kmen haduh katta katta hadien ba ka sorkar ka la pynurlong ïa katei ka kam.
Ha katei ka sngi la ïoh ruh ïa ka jingkren na u bah Lurshai Kharbani MDC u ba la ong ba ka jingdon jong katei ka jaka sumar, ka long ka jingkyrkhu kaba khraw khamtam eh ïa ki longkmie ba armet kiba don kam ïa ka jingsumar kaba paka.
U la ong ruh ba ki longkmie kiba armet ki dei ban shimkhia ha kaba leit phah check up bad leit kha khunlung ha katei ka jaka sumar, khnang ba ki khunlung kin long kiba shait ba khlaiñ bad ba ka jingkhlad noh jong ki longkmie ha ka por ba ki kha khun kan duna.
Ha kajuh ka por la ïoh ïa ka jingkren na u Dr Z.Marak u ba la kyntu ïa ki paitbah nongshong shnong ba kin ïatreilang bad ki nongtrei ha katei ka jaka sumar. Namar, lada ki paitbah kim ïatreilang ka shem jingeh ïa ki nongtrei ba ki lah ban pynbiang ïa ki jingdonkam jong ki.
