Nongpoh, Nohprah 10: Ka long shisha ka jingkmen kaba khraw ba hadien bun phew snem ka jingap khmih lynti bad ka jingangnud ki paidbah ka shnong Diwon mynta ka sngi ka la urlong, ha kaba u MLA ka Nongpoh u Bah Mayral Born Syiem da lade u la plie paidbah noh ïa ka Auditorium hall ha ka Shnong Diwon ha kaba ïa kane ka Auditorium Hall la ai nam ha ka kyrteng u (L) Dr. D.D Lapang, uba dei u MLA barim ka Nongpoh bad u Myntri rangbah ka jylla Meghalaya.
Ha kane ka sngi, nalor ka jingplie paidbah ïa katei ka Auditorium Hall, u Bah Mayral Born Syiem u la plie paidbah ruh ïa ka ICDS Building hapoh ka Shnong Diwon, kaba la long shisha ka jingmyntoi na ka bynta ki paidbah nongshong shnong ka Shnong Diwon.
Haba plie paidbah ïa kitei ki kam pynroi, la sakhi lang ruh da ka jingdon lang u Raja Brahma Project Director ka DRDA, Bah Eric Dkhar BDO ka Umling C&RD Block, Bah R Kharshilot Child Development Project Officer, Bah Balajied Ranee MDC barim ka Nongpoh, Bah Bishar Tmung Rangbah Shnong bad kiwei kiwei ki riew rangbah bad ki nongshong shnong naka thaiñ Umden bad Diwon.
Kumba la pynpaw da u Bah S Khymdeit Secretary Shnong ka shnong Diwon, u la ong ba ïa katei ka Auditorium Hall la tip mynshuwa kum ka Diwon United Youth Association (DUYA) Hall, ba la seng naduh u snem 2004 da ki Club kiba don hapoh ka shnong Diwon bad dei lyngba ka jingioi jngai u Dr. D.D Lapang ïa ka jingdonkam ïa ka Hall mynta la urlong ba ka Shnong ka la ioh ïa kane ka Auditorium Hall.
U la ïathuh ruh dei ha u snem 2023, ka Shnong ka la pan bad shimti noh na ki Club ïa katei ka Hall bad da ka jingïasngewthuh jingmut bad ka shnong la pynkylla kyrteng noh sha ka Diwon Auditorium ba ka shnong bad ki Shnong ba marjan ki lah ban pyndonkam lang na ka bynta ki jingdonkam bapher bapher. Kane ka Auditorium hall ka la urlong ruh ka dei lyngba ka jingbuddien u Bah Mayral Born Syiem kum u MLA ba ka shnong ka la lah ban dang pynitynad bad pynbha briew lyngba ka jingïarap u MLA da ka skhim SRWP ha kaba la ai nam ruh ha ka kyrteng jong u Dr. D.D Lapang.
Haba kren ha kane ka sngi kum u kongsan, u Bah Mayral Born Syiem u la pynpaw ïa ka mynsiem jong ka jingkmen ba la lah ban plie paidbah ïa kitei ki 2 tylli ki kam pynroi ba kynthup ïa ka Auditorium Hall bad ruh ïa ka ICDS Building ka ban sa long shisha ka jingkyrkhu pateng la pateng ha ka Shnong Diwon.
U la ong ruh ba kane ka Auditorium Hall ka dei ka matti jong u Dr. D.D Lapang ba la sah teng la slem khlem da lah ban pyndep bad mynta hadien ba la pyndep pura ïakatei ka Auditorium la ainam noh ha ka kyreng u Dr. D.D Lapang kum ka jingpynsah nam ba u dei u MLA barim bad ruh u Myntri rangbah barim ka jylla.
Shuh shuh, ruh u la kyntu jur ruh ïa ki nongshong shnong ba kin don kata ka mynseim jong ka jingïatrei lang na ka bynta ban wan kiwei kiwei kikam pynroi bad ha kajuh ka por ruh u kyntu ban sumar bha ïa katei ka Auditorium Hall bad ruh ïaka ICDS Building khnang ba kan long shisha ka jingmyntoi na ka bynta ka pateng ban sawa jong ki nongshong shnong ha katei ka thaiñ,, u la bynrap.
Lyngba jong kane kane ka sngi, ka shnong ka la pynkup burom ruh ïaka samla Dahunshisha khymdeit, kaba dei ka samla na ka Shnong ka ba la khur takma ksiar haka open full contact karate championship 2025 ka ba la long haka 29 and 30 Naiweing 2025 ha Kolkata.
