Nongstoiñ, Naiwieng19: Na ka bynta ban pynsuk ïa ki paitbah nongshong shnong kiba pang ba shitom ban ïoh ïa ka jingsumar kaba biang, ha ka sngi hat majai ka 18 tarik Naiwieng u bah Methodius Dkhar MLA ka Mawshynrut constituency u ba dei ruh u Myntri ha ka sorkar jylla, u ba dei peit ïa ka tnad sam mar bam bad Labour, u la plie paitbah ïa ki ar tylli ki Sub Health centre ka Japung Health & Wellness Centre bad ka Nongrynñiaw Health & Wellness Centre.
Ha katei ka juh ka sngi utei u Myntri sorkar u la plie ruh ïa ka taiew ba kyrpang na ka bynta ki khunlung kiba dang kha hapoh kane ka taï haduh kiba la dap arphewphra sngi ka karta. Ha ka sngi ba u Myntri sorkar u la plie ïa kitei ki jaka sumar la ïadonlang da ka kong M.K.Sohliya District Medical & Health Officer u Doktor Z.Marak Addl DM&HO, u Nodal Officer jong ka tnad ka koit ka khiah, u bah R.Kharkongor Block Development Officer ka Mawshynrut C&RD Block, u bah Sraly Rashir MDC ka Mawshynrut, ki staff jong ka tnad ka koit ka khiah, ki Nirses, ki ASHA bad kiwei kiiwei ki nongtrei.
Ha katei ka sngi ha shuwa ban plie ïa kitei ki jaka sumar, la pynlong ïa ki jingïalang ba lyngkot ha kaba la ïoh ïa ka jingpynshai halor ka jingkoit jingkhiah bad ka jingthmu jong ka sorkar, ban rakhe ïa ka taïew ba kyrpang jong ki khunlung ba dang shu kha da ka Kong M.K.Sohliya.
Ka kong Sohliya haba pynshai halor kataïew ba kyrpang jong ki khunlung ba dang kha, ka la ong ba ka jingthmu ba kongsan jong ka sorkar ban rakhe ïa katei ka taïew, ka long ban pynsngewthuh ïa ki longkmie kumno ba kin sumar ïa ki khunlung naduh ba dang kha, ban ai jinghikai ruh ïa ki ban sumar na ka jingpang Pneumonia ka jingpang kaba ktah jur bha ïa ki khunlung naduh ka por ba dang shu kha.
Ha kajuh ka por la ïoh ïa ka jingkren pynshai na u bah R.Kharkongor BDO ka Mawshynrut, u bah Sraly Rashir MDC bad khatduh eh la ïoh ïa ka jingkren na u bah Methodius Dkhar MLA uba dei ruh u Myntri sorkar uba long u kongsan.
Haba kren kum u kongsan ha katei ka sngi u bah Methodius u la ong ba ka Mawshynrut constituency, ka dei kaba ïar haduh katta katta bad ki kam pynroi ki dang duna bha bad ki paitbah ki angnud bad ki ju dawa na ka por sha ka por ban pynïoh ïa ki. Hynrei wat la u la shah jied kum u nongmihkhmat um lah ban pynurlong ïa baroh ki jingdonkam jong ki paitbah ha kajuh ka por.
Watla katta ruh u la pyrshang katba lah ban pynsngew sha ka sorkar ba ki paitbah hapoh ka constituency jong u ki dang donkam shibun bah ki jingïarap na ka sorkar la ka long ki surok, ki skul bad ki jaka sumar. U la ong ruh ba napdeng ki jingdawa ba ki paitbah ki la pynsngew ha u, ka koit ka khiah ka dei ka mat kaba ha khmat duh kaba u la shim khia ha kaba um shym la shongkli kti ban pynsngew sha ka sorkar man la ka por, ha kaba ka sorkar ruh ka la shah skhor bad ka la pynurlong ïa ka jingkyrpad jong u.
U la ong ruh ba ka jingdon jong ki jaka sumar kiba hajan ka pynsuk shibun ïa ki paitbah haba ki pang ki shitom, hynrei lada ki jaka sumar ki jngai ka pynshitom haduh katta katta ïa ki paitbah namar ki hap ban pylut bun ka por. Nalorkata ka ktah ïa ka jinglut jingsep ha ka leit ka wan bad kumta ter ter.
Ha kajuh ka por u la ong ba ka jingplie ïa kitei ka jaka sumar ka la pynsuk shibun ïa ki shnong kiba mar jan kumta ka don kam ba kin ïatreilang bad ki nongtrei kum ki Doktor, ki Nurses bad baroh ki nongtrei ha kitei ki jaka ai jingsumar. U la kyntu ruh ïa ki paitbah ba ki dei ban don ka jingïa burom markylliang hapdeng ki nongtrei ka koit ka khiah bad ki paitbah.
Nalor kata u la kyntu ruh ba ki nongtrei ha kitei ki jaka sumar ki dei ban trei da ka jingieit bad ka jingsbun, khnang ba ki paitbah ruh kin sngew jan kin ïatreilang ha ki por baroh.
