Jowai, Jymmang 11: Ka long ka sien kaba nyngkong ïa ka District ha kaba lah ban plie ïa ka “ Bal Vidyalaya” (Pre Primary School) ha shnong Mukhla, West Jaiñtia Hills District mynta ka sngi 11 tarik u Jymmang, 2022 kane ka school ka long kyrpang ïa ki khynnah rit kiba don ïa ka rta kaba 3 haduh 6 snem bad ïa kane ka skul la wan ban plie da u MLA ka thaiñ u ma Wailadmiki Shylla.
Kham hashuwa lah don ka jingïalang kaba pynïaid da u ma Ryngkat Sari u ba lah ai ki kyntein pdiang burom ïa ki paidbah kiba wan sakhi ïa kane ka jingplie ïa ka school ha kaba u MLA ka thaiñ ma Wailadmiki Shylla ula long kum u kongsan ha kane ka sngi.
Ka kong Rosemi Sari kaba dei ka trai jong kane ka skul ha ka jingkren kala ong ba ka jingwan kane ka skul ha shnong Mukhla kan long ka jingkyrkhu bad ka jingmyntoi bha ïa ki khynnah rit namar ka jinghikai ka pher na kiwei pat ki rukom hikai, namar ka kong Sari ka la ïoh ïa ki training bad certification bad ka sngewthuh ba ka long kaba pher ka rukom hikai kaba kloi ban pyn sngewthuh bad pynsgew tynnad ïa ki khynnah rit ha ka ban pule.
La ïathuh ba ka rukom hikai kadei kakum ka juk ka ba mynta ka “Digital Learning” kaba pyndonkam da ki kor computer, Tablet bad internet, kan ïarap shibun eh ïa ka CSC (Common Services Centres) e-Governance ka Office kaba ïalam lynti ïa ka ban wanrah ïa kane ka skul ha shnong.
U kongsan Wailadmiki Shylla (MLA) ha ka jingkren u ai ka jingïaroh ïa ka trai jong kane ka skul kumjuh ïa ka trai jong ka skul, kane ka jingwan rah ïa kane ka pre-skul ha shnong kadei da ka jingtrei shitom bad ka jing wad lad ka jong ka.
U la kyrpad ïa ki longkmie ki longkpa ba kin phah ïa ki khun jongki sha kane ka skul khnang ban ïoh ïa kata ka jinghikai kaba khraw katkum ka juk mynta namarki khynnah kiba don ïa ka rta 3 haduh 6 snem ka jabieng jong ki dang long kaba lung te lada ai jinghikai ïa ki da kaba sniew ki kloi ban tip ïa kaba sniew te lada ngi hikai pat ïa kaba bha ki kloi ban tip ia kaba bha. Dei na kata ka daw ba ha kane ka skul ki lah don lypa kata ka system ban hikai katkum ka bor jong ki khynnah. Haba pynkut ïa ka jingkren u kyntu ban long kiba trei shitom ban ïarap kat balah katkum ka jingdonkam kane ka skul ha ki sngi ban wan.
Na ka liang u ma Marda Oo Myrchiang, District Manager CSC e Governance-SPV, West Jaiñtia Hills District u la batai ïa ka jingtreikam ki CSC ha District. U ong ba nalor ka jingdon kane ka skul sa kiwei pat ki jingïarap bad ki jingmyntoi ki paidbah kin ïoh lyngba ka CSC kaba pynïaid da ka trai jong kane ka skul. Ka jingdon ki CSC ha ki shnong ka ïarap bha shibun ïa ki briew ha kaba ki briew kim da donkam shuh ban leit sha sor lane sha ki Office sorkar ban ïoh jingïarap katkum ka jingdonkam jong ki.
shuh shuh u ong ba ki CSC mynta ki lah long kum ki Bank, ki Education centre, ki Insurance service provider, ki jaka die ïa ki symbai, sboh bad kiwei kiwei de ki kam. U la kyntiew ïa ki trai shnong ba kin pyndonkam shisha ïa kane ka CSC khnang ba ka jingmyntoi kan long ïa ka shnong hi baroh kawei. Ha shwa ban pynkut ïa ka jingkren u ong ba don ki free computer course training ïa ki khynnah skul, ki samla, ki longkmie, ki rangbah kiba lah ban wan pynrung kyrteng na kane ka CSC.
Na ka liang u ma Comfort Rympei Assistant Manager CSC-SPV, Meghalaya ha ka jingkren u ong ba ka jingdon kane ka skul ha ka shnong kaba dei ïa ka klas Nursery, KG bad UKG ka long ka jinghikai ka ba thymmai ïa ki kynnah rit ban pynproh ïa ka jabieng namar kadei ka jinghikai kaba ymdei shu pule ia ki kot hynrei da ka ialeh kai bad kiwei kiwei ki jinghikai kakum ka juk mynta ka “Digital learning” ki khynnah ki kloi ban sngewthuh.
Kumta u buh ka jingkyrpad ïa ki longkmie ba kin phah ïa ki khun rit jong ki sha kane ka skul khhang ban kin ïah ïa kata ka jinghikai (foundation) katkum ka technology kaba mynta. Kane kadei ka jingsdang bad la khmih lynti ban wanrah shuh shuh ki training ba bun jait ki vocational training, ki skill training bad kiwei kiwei katkum ka jingdonkam ka shnong.
Kiwei de ki Nongkren ki khynthup ïa ka Kong Ameecia Pariat DM CSC-SPV, West Jaiñtia Hills District, Shri Buhlut Suna, Rangbah shnong Mukhla Nongrim bad u ma Nang Oo Chwa Sari. La pynwai ïa kane ka jingïalang da kaba kitbok kitrwiang ïa ka kong Rosemi Sari ba kan pyntrei kam bha ïa kane ka skul bad ot ïa u ribbon da u kongsan.
