Plie u MLA ka Jirang ïa ka Health Sub Centre ha Rani Bari, ka shnong khappud Meghalaya-Assam

Nongpoh, Naitung 16: Ka la long shisha ka jingkmen kaba khraw ïa kiba bun tylli ki shnong ha ka thain khappud ka Meghalaya bad Assam ba hap ha Jirang Constituency, ha kaba mynta ka sngi u BLA ka Jirang u Bah Sosthenes Sohtun u la leit ban plie paidbah ïa kawei ka Health Sub Centre ha ka Shnong Rani Bari kaba ai ka jingshakri ïa palat 12 tylli ki shnong ha katei ka thaiñ Khappud ka Meghalaya ha Ri Bhoi District.
Ha kane ka sngi ba la plie ïa ka Health Sub Centre la sakhi lang ruh da ka jigndon lang ka Kong B. Ranee, ADC ka Ri Bhoi, kum ka Symbud Kongsan, ka Dr. A.R Marak, DMHO Ri Bhoi, ka Dr. K. Lyngdoh, Medical Office ka Patharkhmah CHC, ki heh na ka Carona Trust, ki Rangbah Shnong ka thain Rani Bari bad ruh ki paidbah nongshong shnong ka thain Rani Bari,kiba dei ki shnong khappud.
Hadien ba la plie noh ïa kane ka Health Sub Centre, ïa kane ka health sub centre yn pynïaid da ka Carona Trust, kaba dei ka Kompani kaba peit ba khmih na ka bynta ban ai pat ka jingshakri sha ki paidbah katei ka thain ha ka pang ka shitom.
Haba kren ha kane ka sngi kum u kongsan, u Bah Sosthenes Sohtun u la pynpaw ba u dap da ka mynsiem jong ka jingkmen ba la lah ban pynurlong ïa kane ka jingangnudki paidbah ban wan rah ïa kane ka Sub Centre bad ïa kane la pynpaw ruh da ki paidbah ha ka por ba ïakhun ïa ka election 2018 ba lada ki paidbah kin pynjop un kren sha ka sorkar bad kane ka la lurlong shisha kumba la angnud da ki paidbah.
U la ong ruh ba kane ka jinglah ban wan rah ïa kane ka Health Sub Centre kan long shisha ka jingkyrkhu ïa ki paidbah jong ki shnong ba hap ha katei ka thaiñ khappud bad kumba ki la angnud mynta ka la urlong ba kin ioh ban pyndonkam ha ka pang ka shitom kaba ki shem jingeh ban leit sha ki jaka ai jingsumar kiba jngai na katei ka thaiñ.
Shuh shuh, u la bynrap ruh da kaba ong, ba kane baroh ka urlong ka dei ka jingshim khia ka sorkar jylla bad khamtam ka jingkitkhlieh u Myntri Rangbah ka jylla, u Conrad K. Sangma, ha kaba kum u nongmihkhamt katei ka thaiñ u ai ïa kata ka jingkhublei kaba kyrpang ïa ka sorkar bad ruh ïa u myntri rangbah ka jylla.