Nongpoh, Jylliew 13: Kum shi bynta ban dang kyntiew ïa ka pule ka puthi ki khun samla hapoh ka them Ri Bhoi, ka Don Bosco Higher Secondary School Byrnihat mynta ka sngi ka la lah ba plie paidbah sa ïa kawei ka shnat pule ha ka Science Stream kum ka jingailad ïa ki khun samla ba kin ioh ban pule ha ka Science Stream ba dang dang duna ki skul kiba plie ïa ka Science Stream.
Kane ka Don Bosco Higher Secondary School, Byrnihat kaba dei kaba pynïaid da ki phadar Capuchin ba la ai ka jingshakri la bun phew snem mynta ban kyntiew ïa ka pule ka puthi ki heprit, hynrei katkum ka jingïaid ka por la donkam ban plie noh ïa ka science stream ba bun ki khynnah ki donkam ban don kane ka shnat pule hapoh kane ka District.
Ïa kane ka snat pule ki khynnah skul la wan ruh ban plie paidbah da u MLA ka Jirang Constituency, u Bah Sosthenes Sohtun kum u kongsan bad la sakhi lang ruh da ka jingdon lang u Fr. Denny O.F.M Capuchin, Regional Superior, Fr.Anil Parish Priest ka Byrnihat uba dei ruh uba la trei bor bah ban wanrah ïaka science stream hakane ka skul, Fr. Kmenlang Nongrum Principal ka Donbosco School ha ryngkat ka jingïadon lang ki Nonghikai bad ki khynnah skul.
Kum u kongsan hakane ka sngi, u Bah Sosthenos Sohtun u la ai ka jingïaroh ïa ki Capuchin Father’s ki ba la ai ka jingshakri ha kane ka skul haka ban ai ïa ki jingnang jingstad ïaki khynnah kane ka thaiñ kaba la ai jingmyntoi shibun ïaki ba bun halor ka pule puthi kaba dei katkum ka juk stad ba mynta.
U MLA u la sam ruh da ki tablet lane ka Chief Minister digital learning aids sha ki khynnah skul ki ba la pass bha ha ki exam bapher bapher kum ka dak ka jingai mynsiem ïaki bad ba kin long ki ba jop haka jingnang jingstad.
Shuh shuh, na ka liang u MLA kum ban kyrshan lang ban pyndap pynbiang ïaki jingduna ki jingdonkam ki ba dang sah u la kular 5 lak tyngka kat kum ka jingkyrpad jong ki nong pynïaid skul naka bynta ban shna ïa ka laboratory ïa kane ka skul khnang ba ki khynnah kin lah ban pyndonkam ïaka kat kum ka jingdonkam hakane ka juk stad ba mynta.
