Nongpoh, Nohprah 18: Ka Nongpoh Christmas Committee hynnin ka janmiet ka la lah ban plie paidbah noh ïa ka Shyngoid u Khyllung Jisu ryngkat ki rong ki rup bad ki jingpynriam itynnad ïa ka sor Nongpoh, kaba long shi bynta ban pdiang burom ïa ka Christmas bad snem thymmai da ka mynsiem jong ka jingieit bad ka jingkmen.
Ïa kane ka Syngoid u Khyllung Jisu ryngkat ki jingpynriam itynnad la wan ban plie paidbah da u MLA ka Nongpoh u Bah Mayral Born Syiem bad la sakhi lang da ka jingdon lang u u Bah M.B Tongper, Director ka DMR, u President ka Nongpoh Christmas Committee u Bah Donald Rymbai, u Secretary u Plielad Tiewsoh, u Rangbah Shnong ka Nongpoh u Bah S.Mynsong lem bad kiwei kiwei ki nongïalam na ka thaiñ Nongpoh
La wan ruh ban shim bynta ha kane ka prokram kaba long shi bynta ka jingrakhe ïa ka Christmas bad snem thymmai naduh ki Longkmie, ki Longkpa, ki samla bad ha kane ka janmeit la sam ruh ïa ki jain blanket sha kiba bun ki longïing baduk kaba longkum ka jingai sngewbha Christmas bad snem thymmai.
Naduh u Bah Mayral Born Syiem kum u MLA bad kiwei kiba la ai jingkren, ki ai kata ka khubor Christmas bad snem thymmai bad ka phang kaba ki la bann khia ka long ban don kata ka jingsuk, jingkmen bad ka jingieit haba pdiang ïa ka jingwan ka Christmas bad snem thymmai kaba long kata ka khubor ba bha sha ka pyrthei.
