Shillong, Iaiong 26 : U MLA jong ka South Shillong Constituency uba dei ruh u Myntri sorkar ba peit ïa ka tnad Art & Culture u bah Sanbor Shullai mynta ka sngi u la plie ïa ka surok kaba la shna pynheh na khmat Sankerdev College shaduh New Kenches Trace bad Lawsohtun kaba la shna na ka skhim SPA PWD Scheme ha ka jinglut kaba 1,45, 28000 klur tyngka. ïa kane ka surok la ïoh ban shna da ka jingshim khia u bah Sanbor ban leit bud dien bad tynruh ïa kane ka skhim.
ïa kane ka prokram ba plie ïa kane ka surok ba thymmai la pynbit pynbiang da ka MCIC ha ka jingiatrei lang bad ka Dorbar Shnong Lumshatsngi Kenchestrace.
ïa ka jingïalang la pynïaid da u bah Kyrsoi Bok Nongbri uba dei u Rangbah Shnong ka Lumshatsngi Kenchestrace bad la synran lang ha kane ka sngi da ki dkhot ka Dorbar Shnong bad ki riew pawkhmat jong katei ka thaiñ. Ki bor synshar shnong bad ki riew paidbah ki la ai ka jingïaroh ïa kane ka jingshim khia jong u MLA ban ïoh ïa kane ka skhim. Ym tang kane hynrei wat kiba bun ki skhim pynroi pynpar ruh la ïoh hapoh ka constituency dei da ka jingshim khia jong u MLA.
Haba kren haka jingïalang u Rangbah Shnong u la pynkynmaw ïa ki nongshong shnong ba ïa kane ka surok la pyrshang ban pynïoh la bun bun snem hynrei ym shym la ïoh bad dei hadien ba la shim khia da u MLA ba la ïoh artad ïa ka surok.
La ïadon lang ruh ha kane ka jingplie da ki engineer jongka PWD, ki pulit pynïaid kali, ki dkhot ka Srimantha Sankerdeve Cultural Centre, ki dkho tka MCIC, ki nongïalam ka BJP na ka South Shillong Constituency bad ki paid nongshong shnong ka Lumshatsngi. La pynkut ïa ka prokram da ka jingleh burom ïa ki dkhot ka Srimantha Sankerdev Cultural Centre kiba la ai sngewbha ïa ka jaka ban pynheh ïa ka surok. La kren ai khublei da u bah Venus S S Pamthied Secretary Dorbar Shnong.
