Shillong, Naitung : U MLA ka Mawlai u Bah PT Sawkmie ha ka sngi Saitjaiñ ba la lah u la plie ïa ka surok bad sam ïa ki kor pynsawa shnong na ka bynta ka Dong Pdeng Shnong bad u la sam ruh mar ar rylli ki top syntek na ka bynta saw tylli ki dong kiba don hapoh Mawlai Mawtawar.
Ha kane ka jingplie bad jingsam la don lang u rangbah shnong bah Cornelius Kharkongor, rangbah dong Pdengshnong bah Wanlambok Mukhim, ki rangbah dong, ki nongkitkam shnong bad ki paidbah nongshong shnong.
Haba ai jingkren u MLA u pyntip ba u la dep mang 1 lak 50 hajar na ka bynta ban shna ïa ka paiñkhana ha ïing shnong jong ka dong Riattamdong. U ïathuh ruh sha ka shnong ba u la pynkhreh ïa ki skhim ban shna ïa ki surok ha dong Lummawsing, Laitlum bad Riattamdong kiba don hapoh kane ka shnong.
Kumjuh u MLA u la pyntip ruh ba namar ka jingkhapngiah ka surok na Lumawsing u la pynkhreh ban wanrah da ka skhim ka ba 3 klur tygka ban shna ïa ka surok na Um Jympa ban rung sha Mawlai Block, kynthup ruh ïa ka surok ha Riattamdong.
Ha ka ba ïadei bad ka umbam umdih kumba la kyrpad da u rangbah shnong ban shimkhia lem, na ka liang u MLA u la ong ba shen yn sa shna noh namar la dep khot tender ha ka ba ïa dei bad kane kaba la dep mang 21 klur tyngka bad la khmih lynti ba ha u bnai ban wan kin ïoh buh mawnongrim na ka bynta kane ka um kor ïing ban sam hapoh shnong.
Ha ka juh ka por u la kyrpad ruh ïa ki nong Mawtawar da ka jingsngewrit ba kin nang pynjop biang ïa u kum u MLA, khnang ba un nanglah ban buddien bad pynurlong ïa ki kam kiba u la sdang hapoh Mawtawar kum ka PHC bad bun kiwei ki kam pynroi ba kum ka shnong ka donkam.
Ha kane ka sngi la ïoh ruh ïa ka jingkren na u rangbah shnong bah Cornelius, uba la ai khublei bad pynpaw ïa ka jingsngewnguh ia u MLA halor ki kam pynroi ba u la pynïoh bad kiwei ki jingdonkam jong ka shnong.
Kiwei pat ki ba la aijingkren ki kynthup ruh ïa u President ka UDP Mawlai Circle u bah Homer Kharkongor, uba la pynpaw ba ka UDP ka kmen bha ba ïoh ïa u Bah PT Sawkmie kum u kyrtong jong ka bad u la ong ruh, kumba ka long mynta ka lyer ka beh bha sha ka United Democratic Party.
U ong ruh, “Ha u 2023 kin ïoh ban bat hi ïa u lakam ban synshar. U pynpaw ba u bah PT Sawkmie u dei u MLA ba la ih bha bad uba shemphang bad ka jingjied jong u ïa ka UDP ka long ka jingstad jong u bad ka jingïohi jngai jong u.
Shuh shuh na ka liang u bah Wanlambok Mukhim u la pynpaw ka jingkmen ba ki ïoh ïa u nongmihkhmat ba man ba ki ud u shah skhor ïa ki, watla um lah ban ai lut hynrei u ïai pyrshang ban pynïoh.
