Nongstoiñ, Naiwieng, 14: Ka District Social Welfare Department, ha ka jingïatreilang bad ka Life Light Focus Concern, ka pynlong ïa ka jingplie paidbah ïa ka ïing sah ba kyrpang na ka bynta ki kynthei kiba ïakynduh jingeh kaba la tip kum ka Shakti Sadan Home ha dong Mawpun, New Nongstoiñ West Khasi Hills District.
Ka jingtei ïa katei ka Shakti Sadan Home ka dei lyngba ka jingprat lynti jong u Bah Garod L.S.N Dykes, Deputy Commissioner kum u Chairman, Kong D.W. Pakynteiñ DSWO, Member Secretary kaba la long ka jingmyntoi shibun eh ïa ka district. Ka bynta kaba kongsan ka long ban pynkhlaiñ shuh shuh ïa ka jingïarap jong ka District na ka bynta ka bha ka miat bad ka jingïoh bor jong ki kynthei.
Ïa katei ka jaka sah ki kynthei la plie da u Bah Gabriel Wahlang, MLA, u la long u kongsan ha ka jingïadonlang jong u Bah C.P. Mawkhon, MCS, ADC, Kong D. W.Pakynteiñ, DSWO, Rev. I. Dura, Bah A.S. Dohling, Secretary, Life Light Focus Concern bad kiwei pat ki riew rangbah.
Shuwa ban plie ïa katei ka ïing la pynlong ïa ka jingïalang ha kaba la pynïaid da u Dr P.Lyngkhoi bad ïoh ïa ka jingpynshai na ka kong E Kharchandi Director jong ka tnad Social Welfare, halor ki bynta jong ka jingpyntreikam jong ka sorkar ïa ka skhim na ka bynta ka Shakti Sadan.
Ka kong Kharchandi haba pynshai halor katei ka mat, ka la ong ba ka Shakti Sadan ka dei ka ïing pynïasoh bad pynim biang (integrated and rehabilitation home) hapoh ka Ministry of Women and Child Development. Ka jingtei ïa katei ka ïing ka long ban kyrshan ïa ki kynthei kiba ïakynduh jingeh da kaba ai ïa ki ka jaka sah kaba shngaiñ bad kaba skhem.
Nalor kata ka la pynshai ruh ba ka Shakti Sadan ka ai jingïarap ïa ki kynthei kiba la shah ktah ha ki jingïakynduh jingeh bapher bapher, kum ka jingeh ha ïing ha sem, ka jingïakynad bad kiba haïing, ka jingrung ha ka jingkhaïi briew (trafficking), ne ka jingduna ha ka jingïarap ha ka ïoh ka kot.
Ka Centre ka ai ka jaka sah shipor, ka jingai jingïarap ha ka liang jingmut jingpyrkhat, ka koit ka khiah, ka jingïarap ha ka aiñ, bad ka jinghikai ïa ki sap ban im ha ka jingim. Kumta ban pynsuk ïa ki kynthei kiba shem lanot ba kin ïoh ïa ka jingim kaba dap da ka burom, ba kin don ïa ka bor halor lade, ba ki lah ban synshar ïa ka jingim jong ki.
Nalor kata ka la pynshai ruh ba kito kiba wan sha ka Shakti Sadan ki dei kiba la phah da ka Police Department sha ka One Stop Centre (OSC) na ka bynta ka jingpynbeit jingim (institutionalization).
Hadien ka jingpynlong ïa ka jingleit jngoh ha ki ïing ki sem ryngkat ka jingïarap ha ka liang ka jingmut jingpyrkhat ka OSC, ki nongwan sah kin sa phah sha ka Shakti Sadan.
Na ka bynta ka jingïalam bad ka jingïakhmih (supervision and monitoring) ïa ka Shakti Sadan Home, Mawpun, New Nongstoiñ, la thaw ruh ïa ka Adhoc Committee kaba kynthup ïa ki dkhot, ADC (I/C Social Welfare) Chairperson, DSWO (District Social Welfare Officer) Convener, Nongmihkhmat na ka Health Department, Nongmihkhnat napoh ka ophis u Superintendent of Police, SDO MSSDS Nongstoiñ, Nongmihkhmat na ka Life Light Focus Concern. Kane ka treikam noh syndon bad kan bteng beit kumne tad haduh ban pynmih da kawei pat ka hukum kaba thymmai.
