Plie u Medalsing ïa u mawkyrteng bad ïa ka madan phutbol ha ka shnong Mawbrei-Nongdom

Mawkyrwat, Lber 29: Ha ka sngi saitjaiñ jong ka taïew ka 26 tarik u Lber, 2022, u bah Medalsing Lyngdoh u la plie paidbah ïa u mawkyrteng bad ïa ka madan ïalehkai kynjatbol ha ka shnong Mawbrei-Nongdom ka shnong ba marsyndah bad ka shnong Shngimawlieñ kaba hap hapoh South West Khasi Hills District, Mawkyrwat.
Lah ban kdew ba ïa kane ka madan la ïarap ban pyntrei da u Medalsing Lyngdoh dang ha kine ki khyndiat bnai bad ha kane ka 26 tarik la ïoh pat ban plie paidbah noh ïa ka, khnang ba ki samla, ki hep khynnah kiba don ka sap bad kiba kwah ban ïalehkai kynjatbol ne kilanmet kin ïoh ban pyndonkam ïa ka ha ka rukom kaba dei.
Haba kren kum u kongsan ha kane ka sngi, u la pynkynmaw ba hadien ka jingkyrpad na ka Shnong Mawbrei-Nongdom ha kaba ha kine ki snem ba la dep na ka liang jong u, u la ïoh lad ban ïa kynduh bad ïoh ïa shimbynta ban ai sngewbha da ki jaiñkup thiah ha kane ka shnong, kumta na ka liang ka shnong hadien kata ki la buh ka jingkyrpad ban ïa noh synñiang na u ban shna ïa ka madan ïalehkai jong ka shnong.
Kumta na ka liang jong u u khlem buh ka jingartatien hynrei u la sngap bad kohnguh ïa kane ka jingkyrpad jong ka shnong bad dei ha kine ki khyndiat sngi lyngba da ka jingïarap jong u kum ka shnong ka la ïoh ban phah trei ïa kane ka madan ïalehkai ha kaba ha kane ka sngi 26 tarik u Lber, 2022 da lade hi u la ïoh ruh ban plie ïa u mawkyrteng jong kane ka madan ïalehkai.
Shuh shuh u la ong ruh ba lyngba kane ka jingïarap ban pynshna ïa kane ka madan ïalehkai kan sa long ka jingkyrkhu kaba khraw ïa ka shnong ka thaw ha kaba ki lah ban pyndonkam ym tang ban ïalehkai kynjatbal hynrei ïa kiwei kiwei de ki jait jingïalehkai bad kumjuh ruh na ka bynta shibun ki jingdonkam jong ka shnong bad kumjuh ruh na ka bynta ban pyndonkam ha ki kam paidbah kum ki jingïaseng bad kiwei kiwei de.
Na ka liang jong ka shnong bad ka Seng Samla Shnong ki pynpaw ka jingsngewkmen bad ka jingsngewnguh halor kane ka jingkloi ka jong u ban pyntrei ïa kane ka madan, kaba la bun bun snem ki la ju pyrshang ban thaw lad ban pyntrei ïa kane ka madan hynrei kam shem long kaba sei soh satia.
Hynrei dei ha kane ka kynti kaba mynta ki samla shnong ki la ïoh ïa kaba ki thrang baroh shi katta lyngba kane ka jingïarap jong u bah Medalsing Lyngdoh, kumta ki samla jong kane ka dong ka thaiñ ki kyrmen ba kin sa lah ban sei madan ïa ki samla kiba tbit ha ka kam ïa lehkai kynjatbol.