Jowai, Naitung 08: U MDC ka Jowai North ma Brightstar Chyrmang mynta ka sngi ula plie ïa ka prokram ai jinghikai ïa ki khun samla ba kin nang ban ïeng hala ki jong ki kjat kaba la tip ka “Skill training programme” ha ka Electrical Domestic Solution bad ka Plumber Genera’ kaba hap hapoh ka Meghalaya State Skill Development Society (MSSDS) ïa kaba la pynlong ha Bosco Pnar Multipurpose Vocational Training Centre, Salini Colony, Mihmyntdu.
Ha kane ka sngi la wan ban ïadonlang da u ma Lambormi Suchen uba dei u Skill Development Officer ka West Jaiñtia Hills Dist, u Director ka Bosco Pnar, Fr. Francisco Dhar lem bad kiwei de kiba la shah khot sngewbha
Na ka liang u ma Brightstar Chyrmang haba ai jingkren kum u kongsan ula batai shaphang ki jingdonkam ban don kum kine ki prokram ai jinghikai ïa ki samla ka juk ba mynta, ula pyntip ba udei uwei na ki khynnah skul jong ka jaka pule Bosco Pnar bad ki jinghikai baroh kiba ula ïoh na katei ka jaka kala long ka jingmyntoi kaba khraw.
Utei u MDC ula ong ‘kum kine ki prokram ai jinghikai kin ïarap ban pynïoh kam pynïoh jam ïa ki khun samla ha ki bynta bapher bapher’. Ka jingsdang ïa kane ka Meghalaya State Skill Development Society (MSSDS) kala long ruh kum ka lad ïa khun samla ka jylla ba kin ïeng ha ki kam lajong yn ban shañiah tang ha ki kam sorkar, ula kyntu ïa ki samla ba kin pynleit jingmut ban wan titsa sha kane ka prokram ai jinghikai.
Katba na ka liang u Skill Development Officer, ma Lambormi Suchen ula pyntip ba ïaka ‘Skill Meghalaya Programme’ la plie da u myntri rangbah u Conrad K Sangma ha kane ka 8th March 2022 bad ula ka kdew shai ba ka Skill Meghalaya ka dei kawei na ki lad ban ai jinghikai ïa ki samla ba kin nang ban seng ïa ki kam la jong, khnang ba kan pynkiew ruh ïa ka ïoh ka kot jong ka jylla.
Kumba la ïohi mynta ba ka jylla ka don ha ka jingkyrduh kam jong ki khun samla, kumta ka sorkar kala pyrshang ban wad ki lad ki lynti da kaba pynlong ïa kum kine ki prokram ai jinghikai kaba lah ban kyrshan ïa ka jingim bad ka lawei ki jong ki khun samla ka jylla, ong u ma Suchen.
U Director ka Bosco Pnar, Fr. Francisco Dhar, ula kyntu ïa baroh ki nongwan sha kane ka prokram ai jinghikai ei, ba kin shim ïa kane ka kabu khlem da pynsep ei ïa ka por, u ïathuh ruh ka training na ka bynta ka Electrical Domestic Solution kan long 350 kynta bad ka Plumbing General ka long 410 kynta bad kaba ym duna ïa ka lai bnai.
Baroh ki nongïoh myntoi ne ki nongshah hikai na kane ka prokram kila don haduh 100 ngut napoh ka Jaiñtia Hills. Ha ka juh ka por u ai ka jingkitbok kitrwiang ïa baroh kiba ïadon bynta lang naduh ki nongshah hikai bad kumjuh ïa ki kynhun jong kane ka Project.
