Jowai, Nailur 18: U MLA ka Jowai Constituency ma Wailadmiki Shylla ha kane ka sngi Saitjaiñ ula plie ïaka Auditorium jong ka Ches’ Stars Higher Secondary School kaba don ha Chutwakhu Jowai bad ka jingdon jong kane ka Auditorium kan ïarap ïa ka skul ba kin ïoh ban pynlong ïa ki prokram bad ki lad ai jinghikai bapher bapher.
Ha kane ka sngi la wan ban ïadonlang da u Deputy Commissioner ba thymmai ka West Jaiñtia Hills u bah B.S Sohliya, ka District School Education Officer ka kong A.P Syiem, u President jong ka skul u ma S.Laloo, ki nonghikai, ki khynnah skul bad ki kmie ki kpa, nalor kiwei de kiba la shah khot sngewbha, katba ïa ka jingïalang la pynïaid da u R. Shullai bad ka K. Rapthap bad la sdang ïa ka prokram da ka jingpule ïa ka ktien u Blei bad duwai na ka kong D. Suting.
La ïathuh ba ïa kane ka Auditorium jong skul la tei ïa ka kum ka dak banpynsah kynmaw burom ïa u (L) J. Jones Syngkon bad ka (L) Sibly Rease Chullai kiba la synñiang naduh ba sdang jong kane ka skul, ïa kaba la seng ha ka 4 tarik u March jong ka snem 1991 la pynsngew da u ma S.Laloo.
Kane ka skul kala ïaid lynti suki pa suki hapdeng ki jingeh ba bun hynrei lyngba ki nongpynïaid ka skul la lah ban pynkiew kyrdan ïa ka na uwei u snem sha uwei pat haduh mynta kala poi sha ka kyrdan Higher Secondary School lyngba ka jingïarap kumjuh na ka SSA Grant.
U ma Wailad haba kren kum u kongsan ula pynpaw ka jingsngewkmen ban ïadon bynta lang ha kane ka sngi bad ki kitbok ïa kane ka skul bad khamtam ïa ki nongïalam (Managing Committee) ka skul ba kin nang ai ka jingnang jingstad ïa ki khynnah pule.
‘Ka pule phuthi ka long kaba eh bha mynta ki sngi kumta ka donkam bha ïa ka jingnang jingstad katkum ka juk ba mynta da kaba don ïa ki smart Class, ki Auditorium, ki madan bad kiwei de’ ong ma Wailad.
Ban pynbha shuh shuh ïa ka pule puthi hapoh ka jylla u ma Wailad u ong na ka liang jong ka sorkar kala dep pynban lyngba u myntri rangbah ba ka Thomas Jones kan sa hap hapoh ka People’s College Grant in aid schemes kaba lah ban ai jingïarap ïa ka bai college jong ki samla pule, ula pyntip ruh ba ka sorkar kan pynbha pynmiat noh ïa baroh ki Govt. L.P skul hapoh ka jylla.
Ha kane ka sngi ka skul kala aiti ruh ïa ka Memorandum ha u MLA ba un ïarap katba lah ka bor na ka bynta ki jingdonkam jong ka skul, la pynphuh pynphieng ïa kane ka sngi da ki jingrwai bad ki jingshad tynrai da ki khynnah pule jong ka skul. Katba ïa ki kyntien ai khublei la ïoh na ka Principal jong ka skul ka kong I.J Chullai.
