Jowai, Risaw 15: Ïa ka ïing skul ba thymmai jong ka Jaraiñ Government Lower Primary School, kaba la seng naduh u snem 1910, la plie mynta ka sngi 15 tarik u Risaw da u MLA ka thaiñ u ma Lahkmen Rymbui shi bynta ban kyntiew ïaka pule puthi bad ka roi ka par haka thaiñ Amlarem lyngba ka jingïarap pisa na ka Special Rural Works Programme (SRWP) 2023–24.
La wan ban donlang ha kane ka sngi da u ma Jamshaphrang Pohtam u MDC ka War Central, ka kong Deibor Patrecia Lytan I/C SDSEO, Amlarem Sub-Division, ki nongïalam shnong, ki nonghikai, ki khynnah skul bad ki paidbah nongshong shnong ka Jaraiñ Amlarem Sub-Division.
La sdang ïaka jingïalang da ka jingkren pdiang burom na Chairman, School Management Committee (SMC) bud sa ka jingrwai kyrpang bad ka jingshad tynrai na ki khynnah skul Jaraiñ Government L.P. School bad Amwi Jaraiñ U.P. School. La ïoh ruh ïa ki kyntien jingkren lyngkot na u ma Manner Myrmen (Chairman), kong Lahba Pamthied (Retd. Head Teacher), kong Florimai Mukhim (Head Teacher) bad ma Jamshaphrang Pohtam (MDC, War Central) kiba pynpaw ïa ka jingdonkam jong ka pule puthi bad ka jingïatreilang jong ka shnong.
U kongsan ma Lahkmen Rymbui haka jingkren ula pynpaw ïaka jingkmen halor ka jinglong jong kane ka skul kaba rim tam ha kane ka thaiñ bad ula pynpaw ruh ïa ka jingai jingkyrshan jong u sha ka pule puthi ha ki bynta jong ka thaiñ khappud.
Ula kdew ba la pyndonkam 20 lak hapoh ka Border Areas Development Programme (BADP) na ka bynta ka jingtei ïa ki jaka pule bad ka jingpynbha ïa ka ïing skul. Shuh shuh ula ai ruh 9 lak na ka MLA Scheme ban pynkhlaiñ ïa ki jingtei bad ki jingdonkam haka skul.
U la pynbna ruh ba la buh bynta haduh 8–14 lak hapoh ka PM-POSHAN (Mid-Day Meal) Scheme na ka bynta ka jingtei ïa ka ïing bam bad ka um ba khuid, ha ka juh ka por ula kyntu ïa ki nongïalam shnong ba kin pynkhreh na bynta kane.
U MLA la pyntip ruh ba la ai ïa ka work order kaba 10 lak na ka bynta ka Seng Pynryumlang Ki Hyntha School ban pyndep ïa ki jingtei ba kham bha bad la khmih lynti ruh ban ïoh 2 klur hapoh ka BADP na ka bynta ka jingpynbha ïa ki lynti syngkien hapoh shnong Jaraiñ bad ki shnong ba marjan.
Ula kdew ruh ba kine ki kam ki ïadei bad ki skhim jong ka Sorkar Pdeng, Pradhan Mantri Adi Adarsh Gram Yojana (PMAAGY) bad PM Janjatiya Unnat Gram Abhiyan (PM-JUGA), kiba ai 20.39 lak sha man ka shnong trai ri trai muluk na ka bynta ki jingtei kum ki skul, ki jaka sumar, um bam bad ki surok.
U ma Lahkmen ula ong ruh ba ka kam Hospital ha katei ka thaiñ ka dang ïaid shaphrang bad u kwah ban khot ïa u Myntri Rangbah ka Jylla ban wan sha Jaraiñ haka Golden Jubilee Celebration jong ka Amlarem Sub-Division haka 12 tarik u Naiwieng, 2025 naka bynta ka jingplie bad ka jingïohi bniah ïa ki kam pynroi bapher bapher hapoh ka thaiñ.
Ula kyntu ïa ka Village Defence Party (VDP) bad ki kmie ki kpa ba kin long kiba husiar ban sumar ïa ki khynnah pyrshah ïa ki jingjia ba sniew. Ula kyrpad ïa ki khynnah skul ba kin trei shitom bad ba kin nang ban seng kam lajong bad kim dei ban shañiah tang ha ki kam Sorkar. Ula ai jingïaroh ruh ïa ka skul halor ka Kitchen Garden, kaba la ïoh ban lum 20 kilo ka French beans bad ula ai jingmut ba ki khynnah kin ïohlad ban die ïa ki soh kiba pynmih na kane ka kper kum ka lad ïohkam ïohjam.
La pynkut ïa ka jingïalang da ka jingai khublei na ka kong Imonmi Suting (Assistant Teacher) bad ka jingrwai Ri na ki khynnah skul. Ka jingplie ïa ka ïing thymmai jong ka Jaraiñ Government L.P. School, kaba la ïaid lynti la palat shi spah snem, ka long kum ka dak jong ka jingkiew shaphrang ha ka pule puthi bad ka jingïatreilang hapdeng ka Sorkar bad ka shnong ban kyntiew ïa ka jingnang jingstad bad ka roi ka par ha ki thaiñ nongkyndong hapoh ka jylla.
