Khliehriat Iaïong 6: Ka ophis jong ka District Programme Officer, ICDS (CELL), East Jaiñtia Hills District, mynta ka sngi ka la pynkut noh ïa ka jingrekhe ïa ka Poshan Pakhwada kaba la pynlong mynta ar taïew lynter ha Byndihati, Dong Umsngad Community Hall, ha kaba u myntri ka sorkar jylla, u bah Kyrmen Shylla u la long kum u kongsan.
a kane ka sngi, u bah Kyrmen Shylla, u la plie ruh ïa ka Aganwadi Centre ha shnong Byndihati, Dong Umsngad, kaba la bei tyngka da ka National Bank for Agriculture and Rural Development (NABARD)
Haba kren ha ka jingialang, uei u myntri sorkar, u la ban jur halor ka jindonkam ban bam ïa ki jingbam kiba tei ïa ka met kiba long na ka bynta ka koit ka khiah jong ki khynnah da kaba bynrap ruh ba ka tnat ICDS bad ki nongtrei Aganwadi ki don ka bynta kaba ha khmat eh ban kyntu, ban pynshai sha ki paidbah ba ki khynnah kiba dang heh dang san ki donkam bha ban bam ïa ki jingbam kiba tei ïa ka met bad ong ruh ba ka pilot project Early Childhood Development Mission (ECDM), kaba pyntrei lyngba ka tnat Social Welfare ka dei kata ka project kaba don ka thong bad jingthmu ba kyrpang ban pyn biang ïa ki bam kiba bha bad kiba tei ïa ka met, kiba peit ngor ruh ïa ka koit ka khiah bad kumjuh ruh ka pule ka puthi jong ki khynnah.
Ka MCS, EAC, East Jaiñtia Hills District, ka kong F. Wann, ka la ong ba ka jylla Meghalaya ka dei ka wei na ki jylla kaba don ïa ka jing iap noh ki khyllung ba dang shu kha bad ki kmie kiba kha khyllung, kumta ban pyn duna ïa kine, ka sorkar ka la pyntreikam ïa ka Pohshan Abhiyan kaba la pynbna paidbah ha u snem 2018 kum ka lad ban pynshlur bad ban kyntu ïa ki kmie kiba ar met ba ki dei ban bam ïa ki jait jingbam kiba tei ïa ka met, kum ki jingbam kiba don ki vitamins ki ban tei ïa ka bor met bad kumjuh ruh ki ban tei ïa ka koit ka khiah jong ki khyl lung kiba dang don ha kpoh.
Ka CDPO, ICDS Saipung Project, ka kong R.Bareh, ka la ai ïa ka jingpynshai kaba bniah halor kane ka Poshan Pakhwada 2022 kaba la rakhe mynta la ar taiew bad ong ba hapoh kine ki ar taiew la pynlong ïa ka jingthew jingkhia ïa ki khynnah kiba hapoh 6 snem kyrta ha ki Aganwadi Centre, la pynlong ruh ïa ki prokram na ka bynta ki kynthei bad ai jingpynshai halor ka jing donkam ban pynneh pynsah ïa ka um, ban pynlang ïa ka um slap, kumjuh ruh ka prokram kaba pynshlur bad pynshai halor ka jingdonkam ban bam ïa ki jingbam tynrai kiba long ki jingbam kiba tei ïa ka met na ka bynta ka koit ka khiah jong ka kmie bad i khyllung, kumjuh ruh la hikai halor kumno ban pynkylla noh ïa ka rukom im ba ju tip kum ka behavioral change.
