Mairang, Naitung, 5: U Lamphang ka Ïing dorbar Thaw aiñ ka jylla Meghalaya, u Bah Metbah Lyngdoh hynne ka sngi u la plie ïa ka ophis u District Transport Officer (DTO) & Secretary, Regional Transport Authority Eastern West Khasi Hills District Lumsohkhlur Mairang.
Ha kane ka jingplie ophis DTO ha Mairang, la don ryngkat u myntri ka tnad Transport ka jylla, u Bah Dasakhiat Lamare, u myntri ka tnad Water Resources u Bah Brolding Nongsiej, u Syiem ka Hima Nongkhlaw u Pai’em P.M Syiemlieh, u Commissioner of Transport ka sorkar jylla u Bah I. W Ingty, u Deputy Commissioner ka Eastern West Khasi Hills District u Bah W.Nongsiej, u Superintendent of Police ka District u Bah M.B Syiem, ki nongtrei jong ki tnat treikam bapher bapher jong ka sorkar jylla, ki Nongïalam Shnong, ki Principal jong ki skul ka thaiñ bad kiwei kiwei.
Ha ka jingkren jong u kum u Kongsan, u Lamphang ka Ïing Dorbar Thaw aiñ ka jylla, u Bah Metbah Lyngdoh u la pynpaw ïa ka jingkmen ban ïa don bynta ha kane ka prokram bad u la ai khublei ruh ïa u myntri bad baroh ki nongtrei ka tnat Transport ka jylla, namar ka jingpynkloi jong ki, ïa ka jingplie ïa ka ophis u DTO hapoh ka distrik, kaba long kum shibynta ban pynjan shuh shuh ïa ka synshar khaddar sha ki paidbah nongshong shnong.
Haba kren halor kiba bun ki jingjia aksiden kali kiba ïai jia na ka sngi sha ka sngi, u Bah Metbah u la kyntu ïa ki nongshong shnong ban long kiba phikir ha ka por ñiah kali, ba kin pynbiang ïa ki kot ki sla bad ban bud pyrkhing ïa baroh ki aiñ ki kyndon, khnang ban lait na kino kino ki jingjia aksiden ne ki jingjia ba sngewsih.
U la ong ruh ba ka jingplie ïa ka ophis u DTO hapoh Mairang, kan pynthikna ba ïa ki kyndon aiñ ka tnad Transport, la bud pyrkhing da baroh ki paidbah nongshong shnong na ka bynta ka suk ka shngaiñ ki nongñiah, ki nongshong kali bad baroh ki paidbah.
U la ban ruh halor ka jingkordor jong ka khajna ban kyntiew ïa ka roi ka par jong ka ri bad ka jylla bad u la kyntu ïa ki trai kali, ban siew dei por ïa ki khajna ban lait na ka jingshah daiñ kuna na ka daw jong ka jingsiew dier por ïa ka khajna da ki trai kali.
U Myntri ka tnat Transport ka jylla, u Bah Dasakhiat Lamare, ha ka jingkren ka jong u, u la kren shaphang ka jingshngaiñ jong ki nongñiah bad nongshong kali. U la kyntu jur ïa ki paidbah nongshong shnong ban siew biang por ïa ka khajna, ban bud ryntih ïa baroh ki aiñ bad jingbthah kiba kynthup ïa ka jingdeng ïa u seat belt, ka jingpyndonkam thikna ïa ki signal ha ka por nïah kali, ka jingkiar na kaba pyndonkam ïa ki mobile phone ha ka por ñiah kali bad kumta ter ter.
Katba, u myntri ka tnat Water Resources u ba long ruh u MLA ka Mawthadraishan, u Bah Brolding Nongsiej ha ka jingkren jong u, u la ong ba ka jingdon jong ka ophis u DTO hapoh Eastern West Khasi Hills District, kan pynsuk ïa ki paidbah ka thaiñ ha kaba ïadei bad ki kam kali.
Ha kane ka prokram la ïoh ruh ban pynsngew da u Commissioner of Transport, ka jylla, u Bah I.W Ingty ïa ka jingshakri kiba ka ophis DTO kan ai kiba kynthup ïa ka jingbuh ïa ka thup ki kali kiba la rejistar hapoh ka distrik, ka jingai bad jingpynthymmai ïa ki laisen, ki permit, ki syrnod bapher bapher, ka jinglum khajna, ka jingpyntreikam ïa ki aiñ bad ki kyndon bapher bapher bad kumta ter ter.
Lah ban kdew hangne ba ha ka ophis jong u District Transport Officer ka Eastern West Khasi Hills, nalor u DTO, yn don ruh uwei u Motor Vehicle Inspector (MVI), uwei u Upper Divisional Assistant (UDA), uwei u Assistant System Engineer, uwei u Peon bad uwei u Chowkidar.
Kiwei kiwei pat kiba la kren ha kane ka sngi ki kynthup ïa u Deputy Commissioner ka Eastern West Khasi Hills District, u Bah W. Nongsiej bad u District Transport Officer ka Eastern West Khasi Hills District, u Bah W. Makdoh. Ïa ka prokram ha kane ka sngi la pynïaid da u Additional Deputy Commissioner ka Eastern West Khasi Hills District, u Bah A. Nongbri.
