Shillong, Jymmang 07: U Bah Prestone Tynsong Symbud Myntri Rangbah ka jylla bad MLA ka Pynursla Contsituency ha ka sngi Saitjaiñ ka 7 tarik Jymmang 2022 u la plie paidbah ïa ka ïing Dorbar Hall cum Multi Facilities jong ka Pynursla kaba ai jingshakri na bynta lai tylli ki dong ba kynthup ïa ka Neng Gate, Umkor bad ka Pynursla Proper ha ka jingïadonlang ka Kong Grace Mary Kharpuri kaba dei ka EM jong ka KHADC bad MDC ka Nongskhen kum ka symbud kongsan.
Haba ai jingkren ha kane ka sngi na ka liang ka Kong Grace Mary Kharpuri kala ai jingïaroh bad ong ruh u Bah Prestone udei u nongmihkhmat uba trei shitom bad don ka mynsiem ban kyntiew ïa ka ïoh ka kot ka roi ka par hapoh ka thaiñ bad ruh ha ka jylla hi baroh kawei. Kala pynpaw ruh ba na ka liang jong ka watla kam dei ka MLA hynrei ka pyrshang ban wanrah ka roi ka par hala ka jong ka thaiñ
U Bah Prestone Tynsong haba ai jingkren u la ong ba ka Pynursla mynta kala kylla bak-ly-bak bad kala ïaryngkat kyrdan bad ka nongbah Shillong. U la ong ruh ba ka Pynrusla kadei kawei na ki shnong kaba kiew stet bha hapoh ka jylla bad kala kiew ka roi ka par ba haroh ki liang namar ba ki briew jong kane ka shnong ki pynleit jingmut bha ha ka pule puthi.
Ha kajuh ka por u la ong ruh ba Pynursla kala donkam ka jaka theh niut kaba paka namar ka jingnang bun biew bad ruh ka roi ka par.
U la pyntip ruh ba ka sorkar MDA kala trei shitom ban shim ïa ka rai ban pynkynriah noh ïa ki briew na them ïew mawlong. Ha kane kajuh ka sngi u Symbud myntri Rangbah u la plie ruh ïa ka Fete bala pynlong da ka shnong Pynursla.
Ha kane ka sngi la ïadonlang ka SDO jong ka Pynursla Civil Sub-Division ka kong Ibarina Liza Warjri, BDO ka Pynursla C&RD Block Bah Gautam Warjri, Rangbah Shnong ka Pynursla Pyllun Bah Mudonsing Khongthaw, Rangbah Dong ka Pynursla Proper Bah Nilus Massar, Syiem Khynnah ka Hima Khyriem, ki longkmie longkpa, ki samla haduh ki hep kiba rit.
