Plie u Dy. CM ïa ki jingkieng thymmai ha Wahumkhrah bad Umpling

Shillong, Lber 31:U Symbud Myntri Rangbah ka Jylla ba khmih ïa ka Tnad Public Works Department (PWD) Bah Prestone Tynsong, hynne ka sngi palei, ula plie paidbah ïa ki artylli ki jingkieng Two Lane ba la tei thymmai ha Mawlai Wahumkhrah bad ha Umpling haba kyrmen ba kine ki jingkieng kin iarap ban pynduna ïa ka jingdheng kali hapoh ka Nongbah Shillong.
Kine ki artylli ki jingkieng ki dei kiba la tei na ka Central Road & Infrastructure Fund (CRIF) 2018-2019 ha ka jing mang tyngka ba mar T. 5 klur.
Ha Mawlai Wahumkhrah, u Symbud Myntri Rangbah ka Jylla ula pynbna ruh ba ka Sorkar Jylla kala dep mang mynta ïa ka song pisa ba kot T. 75 klur na ka bynta ka shnong Mawlai, ban shna pynheh ïa ka surok VIP ba pyniasoh sha ka Kad Liengsuiñ ha Umroi.
Kat kum ka jingong jong u, kane ka surok (VIP) kan ïaid na Mawlai By-Pass bad kan mih sha Mawlai Umsaw bad nangne kan mih sha Umrynjah bad sa pyniasoh bad ka Kad Liengsiuñ haduh da poi ka Shillong By-Pass.
“Kane ka project ka long ha ki arbynta-T.50 klur ïa ka surok na Mawlai By-pass sha Umrynjah ka ban bei tyngka da ka DoNER Minister bad T. 25 klur na Umrynhah sha Shillong By-Pass ka ban long da ka Double Lane, ka ba la mang na ka CRIF” ong u Bah Prestone.
Haba ïadei bad ka jingkieng Wahumkhrah, u Symbud Myntri Rangbah ula ong “Ka jingtei thymmai ïa kane ka jingkieng ka dei ka thong jong ka Sorkar ban pynduna ïa ka jingdheng kali hapoh ka Nongbah Shillong bad kan pynsuk ïa ka leit ka wan ki nong Mawlai bad nong Jaiaw” ong u Bah Prestone.
U Bah Prestone ula pyntip ba ïa kane ka jingkieng la khangdam ha u snem 2019 ban tei thymmai bad ka jingslem ban pyndep ïa ka jingtei ka dei namar kiba bun ki daw kynthup ka jingwan lynshop ka khlam Covid-19, kaba la ktah jur ïa ka jingïaid shaphrang jong ki kam pynroi bapher bapher hapoh ka Jylla.
Kiba iadonlang ha kane ka jingplie jingkieng ki kynthup ïa u MLA ka Mawlai Bah Process T Sawkmie, MLA ka North Shillong Constituency Bah Edilbert Nongrum, MLA ka Mawryngkneng Bah Pynïaid Sing Syiem, ki Engineer ka PWD bad kiwei kiwei.
Na ka liang u MLA ka Mawlai ula ai khublei ïa ka Sorkar Jylla, ïa u Symbud Myntri Rangbah bad kumjuh ruh ïa ka Tnad PWD kiba la shimkhia haba ïadei bad ka jingtei thymmai ïa ka jingkieng ha Wahumkhrah bad ka jingplie ïa kane ka jingtei ka ban ai shibun ki jingmyntoi ïa ki paid nongshongshnong ka Mawlai.
U MLA ula pyntip ruh ba shen na ka liang ka jong u, un sa wanrah ïa ka skhim ban tap noh ïa ki nala hapoh ka shnong Mawlai Nongpdeng na ka bynta ka bit ka biang jong ki paidbah bad ka shnong.
Hashuwa kane, u Symbud Myntri Rangbah ula leit ban plie ïa ka jingkieng thymmai ha Umpling kaba jrong kumba 24.75 meter ha ka jingiadonlang ki MLA Bah Pynïaid Sing Syiem, Bah Charles Pyngrope, Bah A.L.Hek bad ki Engineer ka Tnad PWD.