Plie u DC ka Ri Bhoi ïa ka projek ban pyntreikam ïa ka Payment for Eco System Service ha Ri Bhoi

Nongpoh, Jylliew 28: U Deputy Commissioner ka Ri Bhoi, u Arpit Upadhaya mynta ka sngi u la plie paidbah ïa kawei na ka projek ba la tip kum kata ka Payment for Eco-System Service (PES) kaba dei kawei na ka skhim kaba don ïa ka thong ban pyndonkam ïa ki marpoh khyndew kum shi bynta ban ïada ïa ka mei mariang. Ïa kane ka skhim la plie paidbah da u Deputy Commissioner ka Ri Bhoi, u Arpit Upadhaya ha ka jingïalang kaba la long ha Conference hall ka ophis u Deputy Commissioner ha Nongpoh.
La sakhi lang ruh ha kane ka sngi da ka jingdon lang ki ophisar sorkar na ki tnad treikam bapher bapher bad kynthup ruh u syiem ka HIma Jirang, u Paiem H. Wahlang, u Sordar ka Nongpoh Elaka Sirdarship, u bah Wanphrang Syiem, ki nongïalam shnong bad kiwei kiwei ki riew paidbah.
U Deputy Commissioner ka Ri Bhoi, u Arpit Upadhyaya haba kren ha kane ka sngi u la kren bad pynshai shaphang ka Payment for Eco System Service ba ka sorkar ka pynshlur ïa ki paidbah ban ïada ïa ka mariang bad ha kajuh ka por ba kin lah ban pyndonkam ïa ki mar poh khyndew da kaba ka sorkar ka pynshlur ban ai da ka khusnam ïa kito kiba don ka jingkitkhlieh ban pyndonkam ïa kita ki mar poh khyndew (Natural Resources) kaba long ruh shi bynta ka jingïada ne ban pynneh pynsah ïa ka mariang.
Na ka lïang u Bah W. Swer, General Manager (KM) u la pynshai ba kane ka payment for Eco System Service skhim la pyntreikam na sha ki shnong ki thaw lyngba kata ka Community Led Landscape Management Project (CLLMP) ha kaba ka jingthmu ka long ban kryshan ïa ki shnoing, ka imlang ka sahlang, ki riew shimet kiba don kata ka mynsiem ban ïada ne pynneh pynsah ïa ki khyndew ki shyiap, ne ki khlaw ki btap la kumno kuno ba ki la ri la sumar kumba 30 snem ei ei kaba dei ruh ka thong ban pynneh pynsah ïa ki mar poh khyndew ne ki khlaw ki btap.
Shuh shuh, u la pynshai ruh ba ki nongioh bynta ïa kane ka skhim ki lah ban shim ïa ka kabu ban ioh ïa ka pisa kaba 8000 lada ki la don ka khlaw kaba la heh haduh 5 hectare bad kan don ruh ka jingai tim kaba long Rs. 5000 per hectare na ka bynta kito kiba la dep ban registered lypa ha ka tnad forest bad kan don ruh ka jingai tim kaba Rs. 2000 na ka bynta kito kiba don ki khlaw kiba rben bad kiba lah ban pynneh pynsah ïa kai marpoh khyndew ne ki jingmyntoi ba ioh na ka mariang.
Lyngba jong kae ka sngi la hadien ba la dep plie da u Deputy Commissioner ka Ri Bhoi ïa katei ka skhim, la pynlong ruh ïa ka jingïatai halor ki kyndon ne ki bynta ba kumno ba dei ban pyntreikam ïa kane ka skhim bad kiei ki lad ki lynti ba ki hap ban ioh ïa ka jingmyntoi katkum katei ka skhim.