Plie u DC ïa ki kamra klass jong ka Khliehriat LP School ba bei tyngka ka Star Cement

Khliehriat Naitung 30 :U Deputy Commissioner ka East Jaiñtia Hills District, u Abhilash Banarwal, IAS hynin ka sngi u la plie donburom ïa ki hynriew tylli ki kamra klass kiba thymmai jong ka skul Lower Primary School Khliehriat East, ïa kine ki kamra klas la bei tyngka da ka company Star Cement Lumshnong, ha ka jingpynlut kaba T 33 lak tyngka bad kumba 10 percent la pynlut ruh na ka shnong, ha kajuh ka por ka company ka la pynbiang ruh ïa ki ben ban shong klass ki khynnah.
Haba kren kum u kongsan, u Abhilash Banarwal, IAS, u la ai ka jingkhublei ïa ka tnat CSR jong ka company Star Cement kaba la la theh ki jingïarap ha kaba pynheh shuh shuh ïa kane ka skul L.P ha Khliehriat East, kaba long kum shibynta ban kyntiew iya ka jingnang jingstad ha ka thaiñ, u la ong ruh ba ka jingnang jingstad ka long kaba donkam haduh katta katta kaba long kum ka lad ban kyntiew ïa ka lawei jong ki khynnah bad kumjuh ruh ka ban kyntiew ïa ka imlang ka sahlang, u la ong ba na ka liang ki bor district ruh kin ai ïa ka jingkyrshan katba lah ban kyntiew ïa ka jingnang jingstad.
U Tejbir Singh, uba dei u Administrative jong ka company Star Cement, u la ai khublei ïa ka Dorbar Shnong Khliehriat East bad kumjuh ruh ïa ki bor pynïaid jong ka skul kiba la ai ka jingïatreilang bad ka tnat CSR halor ka jingpyntrei ïa kane ka skul, u la ai khublei ruh ïa ka kynhun jong ka CSR ba kynthup ka kong Bornalee Kharlukhi bad ka kong Unity Khonglah, kiba dei ki project Assistant kiba hapoh ka jingïalam u CSR Manager, u Kingsok.K.Borah, kiba la lah ban pyndep shibun ki project kiba la long ka jingmyntoi ïa ki shnong ki thaw bad ïa ka imlang ka sahlang.
Utei u heh jong ka Star Cement, u la kyntu ruh ïa ki kmie ki kpa ba ki dei ban phah ïa ki khun sha ki skul pule kiba kham shalor namar ka jingnang jingstad ka dei ka lawei ba phyrnai jong ki khynnah.
Kumjuh ruh u Management Representative jong ka company Star Cement, u Devander.K.Bansal, u la ïathuh ba ka company ka la ïarap ban shna hynriew tylli ki kamra klass ryngkat bad ki ben ban shong bad ban thoh ki khynnah, la ong ruh ba ha kaba sdang ïa kane ka project ka dang dei tang kaba rit, hynrei suki pa suki kane ka project ka kham heh haduh banda lah ban pynurlong haduh hynriew tylli ki kamra klass ha kaba ki khynnah mynta ki la lah ban ïa shong kylluid ha ki kamara klass “nga sngewtynnad ban ong ba kiei kiei baroh ki iaid beit bad long kiba jop ha kaba ïadei bad ka jingtei ïa kane ka skul bad ngin nang ïai bteng ban theh ki jingïarap sha baroh kawei ka imlang ka sahlang” ong u Devander.K.bansal.
Ïa u maw sah jingkynmaw la plie da u Deputy Commissioner, u Abhilash Banarwal, ïa ka jingialang la pynïaid da u Secretary Shnong Khliehriat East, u bah Allaudin Lyngdoh.
La ioh ïa ka jingkren pdiang na u Waheh Shnong Khliehrat East, u bah Kedius Rymbai, kumjuh ruh la ioh ka jingkren na u Local Director, u bah Emlangki Lamare, u Manager CSR-Star Cement, u Kingsok.K. Borah, u Waheh Shnong ba rim, u bah Aivan Swer, ka MDC ba rim ka kong Violet Lyngdoh.
La ïa don ryngkat lang ruh ki nonghikai bad ki khynnah skul jong ka L.P.School Khliehriat East lem bad ki longkmie longkpa jong ka shnong