Plie u CM ïa ka skul EMRS ba nyngkong tam ha ka jylla, buh maw projek kam pynroi ha Pahamsyiem

By Mawphor Editor On Dec 12, 2025

Nongpoh, Nohprah 11: Ka da long shisha ka sngi kaba kmen ïa ki paidbah ka Nongpoh Constituency, ïa ka Ri Bhoi District bad ïa ka jylla hi baroh kawei, ha kaba mynta ka sngi u Myntri rangbah ka jylla u Conrad K. Sangma u la plie paidbah noh ïa kawei ka skulbah ba la tip kum ka Eklavya Model Residential Schools ha Pahamsyiem bad kaba dei ruh ka sien kaba nyngkong ha ka jylla ban ioh kum kane ka skul ban ïoh myntoi ki khun samla ha ka liang ka pule ka puthi.
Ha kane ka sngi, u Myntri Rangbah ka jylla u Conrad K. Sangma, nalor katei ka jingplie ïa katei ka skul kaba la sdang ka jingpynlong Klas, u la buh mawnongrim ruh na ka bynta ban tei ïa ka Synthetic Athletes Track ha Chinchona Pahamsyiem bad ruh ïa u Mawnongrim ka Convention Centre ban sa tei ha ka Shnong Pahamsyiem ha Ri Bhoi District.
Kiwei kiwei kiba la sakhi lang ha kane ka sngi jong ka jingkmen ka bynta ki paidbah ka Ri Bhoi District, ki kynthup ïa u Myntri ka tnad pule puthi u Bah Lakmen Rymbui, u Myntri ka tnad ba peit ïa kam sports u Bah Wailadmiki Shylla, u Myntri ka tnad ba peit ïa ka tnad C&RD u Bah Sosthenes Sohtun, u MLA ka Nongpoh u Bah Mayral Born Syiem, ka MDC ka Nongpoh ka Kong Rona Khymdeit, u Deputy Commissioner ka Ri Bhoi u Abhilash Baranwal lem bad kiwei kiwei ki heh ophisar ka sorkar.
Kum ka jingkmen haba ioh ïa kine ki kam pynroi, la wan shim bynta shitrhem ruh naduh ki Rangbah shnong, ki nongïalam Shnong, ki longkmie longkpa, ki samla bad ki khynnah skul kiba la ioh ban pule ha katei ka skul Eklavya Model Residential School, kaba dei ka sien kaba nynkong tam ba la lah ban pyntreikam ha ka jylla Meghalaya.
Haba kren kum u kongsan ha kane ka sngi, u Myntri Rangbah ka jylla u Conrad K. Sangma, u la ong ba kine ki kam pynroi ki la urlong ha ka jylla, ka dei na ka jingkylluid mynsiem bad ka jingphai khmat lem u Myntri rangbah ka ri U Narendra Modi, u Myntri ka tnad Traibal Affairs ka sorkar India bad ruh lyngba ka jingphai khmat ka sorkar India ban wan rah ïa kita ki kam pynroi ha ka jylla khnang ban myntoi ki paidbah jong ka jylla Meghalaya.
U la pynpaw ruh da kaba ong, ba ka sorkar Meghalaya ka phai khmat bha sha ka tnad Pule puthi, namar ka jingangnud ka long ban kyntiew ïa ka pule ka puthi, ha kaba tang ha ki 7 snem ba la leit noh, ka sorkar ka la mang tyngka sha ka tnad Pule puthi haduh 2000 klur ha u snem 2018 bad mynta u snem 2025 ka sorkar ka la mang haduh Rs. 3500 klur sha ka tnad Pule puthi, ba ka thong ka long ban kyntiew ïa ka pule ka puthi hapoh ka jylla.
U la ong ruh ka daw ba ka sorkar ka phai khmat sha ka pule ka puthi, ka dei ka jingangnud ban kyntiew ïa ka pule ka puthi kaba bha tam ha ka jylla, namar dei tang lada kiew ka jingnang jingstad ki khun samla ngin dang lah ban saindur bad ban wan rah ïa ka jingkylla ne ka jingkiew shaphrang ka jylla ha baroh ki liang, u la ong.
Shuh shuh, u la bynrap ruh da kaba ong, ba ka sorkar ym tang ba ka phai khmat tang ha kaba kyntiew ïa ka pule ka puthi, ba ka jylla ka la ioh pdiang haduh 38 tylli ki skul EMRS ha ka jylla bad ba la mang tyngka haduh 1400 klur, hynrei ka sorkar ka phai khmat ruh ban kyntiew ïa ki kam pynroi ha baroh ki liang na ka bynta ban kyntiew ïa ki paidbah ka jylla ban kiew shaphrang ha baroh ki liang, u la bynrap.