Plie u CM ïa ka OT ha Sohra CHC, buh mawnongrim ban tei ïa ka ïew Sohra

Shillong, Naiwieng 19 : U Myntri Rangbah ka Jylla, Conrad K Sangma ha ka sngi Balang u la plie paidbah ïa ka Operation Theatre jong ka Sohra Community Health Centre (CHC) bad ha kajuh ka por u la buh ruh ïa u maw nongrim na ka bynta ban tei ia ka Iew Sohra Phase – II ha Sohra ha ryngkat ka jingdonlang u Myntri ka tnad ka Koit ka Khiah Bah Wailadmiki Shylla, MLA ka Sohra Bah Gavin Mylliem, MLA ka Shella Bah Balajied Synrem kumjuh u Commissioner and Secretary ka tnad Health & Family welfare Dr. Joram Beda, bad Deputy Commissioner East Khasi Hills District Kong RM Kurbah nalor ki doktor, ki nos bad kiwei kiwei.
Haba kren ha kane ka jingïalang, u Myntri Rangbah u la banjur ïa ka jingdonkam ban trei da ka jingkitkhlieh ai ka kam ym ban trei tang ban pyndep ïa la ka kamram. U la pynkynmaw ruh ba ka Meghalaya ha u snem 2018 ka la don sakhi haduh 230 ngut ki longkmie ba ïap por ba kha khun bad kaba paw ruh kum kaba bun tam eh ha ka ri baroh kawei. Hynrei u la ong pat ba dei da ka sienjam kaba kyrshan 500 tyngka shisngi na ka bynta ki longkmie armet bad ia ki nongsynran, nangta ban pynbiang ïa ki kali ha ka leit ka wan nangta ki jaka sah na ka bynta kiba armet ka la ïarap bad pynhiar stet ïa ka jingbun ki longkmie armet ba mad ïa kitei ki jingjia.
U Myntri Rangbah u la pynbna ruh da ka Outcome-Based Budgeting ban pyntikna ba ki PHCs bad CHC kin ïoh ïa ki song jingkyrshan pisa katkum ka jinglah jong ki ban trei bha bad da ki kam kiba paw.
U Myntri Rangbah ha kane kajuh ka sngi u la buh ruh ïa u mawnongrim ban tei ïa ka Iew Sohra ha ka kylla kaba ar. U la pynbna ruh ba ka thain kan dang ïoh shuh shuh bun ki projek kynthup ïa ka surok ba 2000 klur tyngka lyngba ka World Ban naduh Umtyngar sha Mawsmai kaban sa sdang noh shen.
U la pyntip ruh ba ka Sohra ka la shah jied ha ka Prime Minister Office, DONER Ministry bad ka Tourism Department kum ka jaka kaba nyngkong eh ha ka jylla bad kaba nyngkong eh ha ka ri baroh kawei ban pynkylla dur kum kata ka jaka jngohkai katkum ki kyrdan ha kiwei ki ri ka pyrthei.
Katba na ka liang u Myntri ka tnad ka Koit ka Khiah ka Jylla, Bah Wailadmiki Shylla u la pyntip ba ka thain Sohra ka la ïoh bha ïa ka jingkyrshan na u Myntri Rangbah ka Jylla. U la kren ruh halor ka CMSMS, transit home, ka jingpynbiang ïa ki kali ban leit buh ïa ki longkmie armet bad ruh halor ka MHIS. Nangta u la pyntip ruh ba ki don haduh 34 ngut ki doktor kiba la dep ban thung kam bad ka jingbhah kam ka dang ïaid shakhmat na ka bynta ki 150 ngut kiwei pat ban pyntikna ba ki jaka sumar baroh kin don pura ka jingdonkam ki nongtrei.
La ïoh ruh ïa ka jingkren na u MLA ka Sohra kumjuh ruh na u MLA ka Shella. Ïa ka jingïalang ha kane ka sngi la pynïaid da u SDO ka Sohra Civil Sub-Division Bah MA Challam bad la ïoh ruh ïa ka jingkren na i Dr. AJO Kharduit, DMHO da kaba pynpaw ïa ka jingkmen ba hapoh ka jingïalam jong u Myntri Rangbah ka Sohra CHC ka la ïoh pdiang ïa ka NQAS bad ruh ia ka jingithuh na ka Laqkshya na bynta ka jingshakri kaba paka. Katba na ka liang i Dr. K Kharnaior Senior Specialist i la batai ïa ka jingïaid lynti jong ka CHC kaba la ïoh ïa ka kyrdan kum ka jaka sumar kaba ym ju don ba ïap ki longkmie armet naduh u snem 2017.
La donlang ruh ha kane ka sngi naduh ki ophisar na ka tnad ka Koit ka Khiah, ki nongtrei ka Sohra CHC, ki ophisar na ki tnad sorkar bapher bapher, na ka Hima Sohra, ki nongïalam shnong, ki sengbhalang bad ki nongshong shnong ka thain.