Shillong, Nailar, 16: U Myntri Rangbah ka Jylla u Conrad Kongkal Sangma ha ka sngi Balang u la plie paidbah ïa ka Bio Fertilizer Unit kaba nyngkong eh jong ka jylla kaba don ha ka shnong Kyiem, Mawphlang, East Khasi Hills District.
Ha ka jingplie paidbah ïa kane ka jaka tylliat sboh la sakhi lang ruh da u Bah Paul Lyngdoh uba long u Myntri jong ka Sorkar Jylla bad kiwei kiwei.
Ka thong jong kane ka kor tylliat sboh ka long ban pynmih ïa ka sboh bym khleh dawai bad ban shalan ïa ka sboh ba la pynmih na kane ka jaka sha ki nongrep.
Haba kren kum u kongsan, u la ong ba kane ka Bio Fertilizer Unit kan ïarap ïa ka jingsdang jong ka sorkar Jylla ban wanrah ïa ka rep ka riang ba khlem pyndonkam ïa ki dawai sboh.
“Ka thong jong ngi, ka long ban kynriew ïa ka kam rep ba khlem pyndonkam ïa ka dawai sboh ha ka jylla baroh kawei bad kane ka Bio Fertilizer Unit kan long kum ka shlem bakongsan na ka bynta kane ka jingthmu,” u la ong.
“Ban rep organic ka shong ha ka jingdon jong ka sboh bym khleh dawai. Lada ngim lah ban pynthikna ba ki nongrep kin ïoh ïa kane ka sboh, ha ka dor kaba jem bad ha ka por kaba biang, ki jingtrei shitom jong ngi kin long lehnohei,” u la ong.
Ïa mynta, ka jingdawa sboh organic ha ka jylla ka long kumba 25,000 metric tonne antad.
U ïaiban ruh ba ka mishon jong ka Sorkar ka long ban kynjoh ïa ka thong ban rep organic. “Kane ka Bio Fertilizer Plant kan long ka dak jong ka jingangnud jong ngi ban pynjur ïa ka jingrep organic,” u la bynrap.
