Jowai, Risaw 29: U Chief Executive Member (CEM) ka Jaiñtia Hills Autonomous District Council (JHADC) u Bah Thombor Shiwat ha ka sngi Baar ula plie paidbah ïa ka ‘Jaiñtia Dorbar Hall’ kaba don ha Stand Jowai-Shillong, Loomsooïung, Jowai.
Ïa kane ka Dorbar Hall u CEM ula pynsngew ba la shna ïa ka lyngba ka jingmang pisa na ka 13th Finance jong ka sorkar kmie, kaba la sah teng da ki bun bun snem bad mynta ka kynti la lah ban pyndep ïa ka lyngba ka jingtrei shitom jong ka Council lyngba ka Civil Works Department ba dei peit da u ma Phasmon Dkhar kum u EM.
U Bah Thombor ula ong na ka por sha ka por ki Dolloi hapoh ka Ri-Lum Jaiñtia kila ju pynsngew sha ka Council ban pyntreikam noh ïa kane ka Dorbar Hall, ula ong hadien ba la dep plie ïa ka mynta ka sngi na ka liang ka EC kan sa pyrkhat ban wad ki lad ki lynti kumno ban pyndonkam ïa kane ka ïing Dorbar.
Na ka liang u Ma Phasmon Dkhar, ula ong ba ka Executive Committee naduh ba sdang kala shim khia ban pyndep noh ïa kane ka Dorbar Hall lyngba u Contractor u ma B.P. Najiar, ha ka juh ka por ula ai khublei ïa ki ophisar ka Council kiba la trei shitom ïa ka kam.
Katba u Dy. CEM kaJHADC Bah Lasky Rymbai, ula ong ka jingdon jong kane ka ïing Dorbar Hall kan long ka jingmyntoi kaba khraw eh ïa ki paidbah ka Ri-lum Jaiñtia bad mynta ka sngi kala long ka dak jong ka jingsah kynmaw.
U la ong ka jingdon kane ka Dobar kan ïarap kumjuh ban ïoh ïatei ïa ki kam synshar khaddar na ka bynta ki Elaka bad ki Sirdarship da kaba kyrpad ïa baroh lang ban ïatreilang. “Ka jingdon ka Sixth Schedule kala long kum ka stieh ïa ka jaitbynriew jong ka Ri-Lum Jaintia” ong ma Rymbai.
Ha kane ka sngi ïa ka jingïalang la pynïaid da ka Secretary Council ka kong Barcelona Bamon, la ïoh ki kyntien pdiang sngewbha na u Lotcifer Ryngkhlem, katba ïa ki kyntien ai khublei la ai na u Rambih Challam, Asst. Chief Engineer, JHADC. Kiwei de kiba la wan ban don lang ki kynthup ïa ki EM ka Council ki MDC, ki Dolloi nalor kiwei kiwei de.
