Plie u BDO ka Laskeiñ ïaka ‘Children’s Adolescents and Digital Library’ ha Mooshrot

Jowai, Nohprah 22 : U Block Development Officer, Laskeiñ C&RD Block, u Dr. F. R Shadap, mynta ka sngi 19 tarik ula plie ïaka Children’s Adolescents and Digital Library haka Shnong Mooshrot West Jaiñtia Hills, haka jingdonlang ka kong Weimonlangki Biam, Block Technical Assistant (BTA) Sahsniang Circle, Laskeiñ Block kane ka long shi bynta ban kyntiew shuh shuh ïa ka jingnang jingstad jong ki khun samla ka thaiñ.
Ha kane ka sngi la wa sakhi lang naduh u Waheh Shnong ma Janai Suchiang, ka Secretary ka VEC kong Sankapaya Biam, u Adviser ma Chanky Lyngdoh, u ma Romingstar Lamare, u ma Jetison Tyngkan, Secretary Shnong bad kiwei ki nongïalam shnong.
Na ka liang u BDO ma F. R. Shadap, haba ai jingkren ula pynsngew shaphang ka jingkordor jongka jingnang jingstad ki khun samla kaba long katkum ka juk stad ba mynta da kaba pyndonkam ïa ki tiar ki tar Technology bad ka bor Internet.
Ula ong kane ka jaka ba ki khun samla kin ïoh jinghikai ka long kum ka thong ban pyndap shuh shuh ïa ki jingduna jong ki ha ka pule puthi bad ban kyntiew ïa ka jingnang jingstad. Ula bynrap ruh ba kane ka jaka kan ïarap ïa ki nongpule ban wad jingtip kiba kham bniah shuh shuh.
Ka kong Weimonlangki Biam, BTA, Sahsniang Circle, Laskeiñ Block kala ban jur ïa ka jingdonkam ka jingïatreilang bad ka jingïashim bynta jong ki paidbah na ka bynta ka roi ka par, da kaba pynpaw ba ka jingïatreilang ka long kaba donkam eh ha ka shnong ka thaw.
U ma Janai Suchiang, Waheh Shnong ka Mooshrot ula pynpaw ka jingsngewnguh ïa u BDO halor ka jingplie ïa kane ka Children’s Adolescents and Digital Library hapoh ka shnong, ula ong kane ka dei ka lad ban wanrah jingmyntoi ïa ki samla pule kumjuh ruh ïa ki khynnah skul jong katei ka thiañ baroh kawei.
Ula pyntip ba ka shnong Mooshrot ka don 508 tylli ki longïing bad ka jingbun briew ka long kumba 3,000 ngut bad u pynpaw ruh ïa ki jingdonkam ka roi ka par haka imlang sahlang lyngba ka jingnang jingstad.
Ha kane ka sngi la don ruh ka jingshad tynrai ba la ïashim bynta da ki Village Organization (VO) jong ka Mooshort. Ïa ka jingkren pdiang la ai da u ma Romingstar Lamare, Co-adviser, katba ïa ka jingïalang la pynïaid da u ma Jetison Tyngkan, Secretary Shnong.