Shillong, Jylliew, 05: U MLA jong ka South Shillong Constituency u Bah Sanbor Shullai uba long ruh u Myntri ka Sorkar Jylla ha ka sngi Saitjaiñ u la plie paidbah ïa ka Park ki heprit ha Mynsaiñ Lumparing ïa kaba la mang lyngba ka Central Atal Mission for Rejuvenation and Urban Transformation (Amrut)-Scheme, 2020-2021 ha ka jinglut kaba T. 26,44,090 lak.
Ïa ka jingrakhe ïa ka sngi pynneh mariang la pynlong da ka MCIC 19th South Shillong da ka jingïatreilang bad ka Lumparing Welfare Society, ka Lumparing Women’s Cultural Society, ka Lumparing Gorkha United Club, ka Lumparing 5 Star Club, ka Lumparing Meghdoot Club Mynsain, Lumparing.
Ïa kane ka Greenery Children Park la plie ha ryngkat ka jingsakhi lang jong ki Rangbah Shnong jong ki shnong kiba hap hapoh u pud u sam jong ka Raid Laban Dorbar, ki nonghikai, ki khynnah skul, ki sengbhalang bad ki nongshong shnong jong ka Greater Lumparing Area.
Hadien kane, la sam ïa ki khusnam sha ki kynhun kiba jop ha ka Traditional and Cultural Dance ba la ïashim bynta ka Khasi Group Dancer ka Seng Khasi Lumparing, ka Nepali Group Dancer jong ka Lumparing Gorkha United Club bad ka Bengali Group Dancer jong ka Lumparing Women’s Cultural Society.
La pynlong ruh ïa ka jingïakop dro na ka bynta ki heprit kiba hapoh 5 snem ka rta ha kaba ïa ki nongjop bad ïa ki nongïashim bynta la sam da ki khusnam kum ka jingpynshlur ïa ki.
Ha kane ka sngi, la sam ruh ïa ka Goodwill Gesture Award-2022 sha baroh ki Dorbar Shnong jong ka Raid Laban Dorbar (Greater Laban Dorbar) bad sha ki kynhun bapher bapher kiba ju ïatreilang na ka bynta ka bha ka miat jong ki paidbah bad ki shakri sorkar kiba la la don bynta bad ka Covid Management Committee ban ïakhun thma pyrshah ïa u khñiang jingpang COVID-19 ha u snem 2020 bad 2021.
Ki nongshah pynkup burom ki long ka Dorbar Shnong Upper Lumparing, ka Dorbar Shnong Riat Laban-Kynjat Phutbol, ka Dorbar Shnong Lower Lumparing, ka Dorbar Shnong Laban, ka Dorbar Shnong Lumshatsngi-Kench’s Trace, ka Dorbar Shnong Madan Laban, ka Dorbar Shnong Kench’s Trace, ka Oxford Hill & Rilbong, ka Lumparing Welfare Society, ka Lumparing Women’s Cultural Society, ka Lumparing Nepali Secondary School, ka Lumparing Vidyapith Secondary School, ka Lumparing 5 Star Club, ka Lumparing Meghdoot Club, ka Lumparing Gorkha United Club.
Ïa kine la pynkup burom da u Bah Sanbor Shullai uba la long kum u Kongsan bad u Rangbah Shnong u Bah HB Wahlang uba la long kum u Symbud Kongsan.
