Shillong, Nohprah 23: U Myntri ka tnad Veterinary and Animal Husbandry Bah Sanbor Shullai ba dei ruh u MLA ka Shillong South ha ka sngi Nyngkong (22 tarik Nohprah, 2025) u la plie paidbah ïa ka madan ïalehkai Basketball jong ka Rilang Children’s Homes kaba don ha Nongshilliang Nongthymmai.
Kumban shu pynkynmaw dei ha u Nailar mynta u snem ba u Bah Sanbor u la leit ban rakhe ïa ka Sngikha jong u hangtei bad u la noh synñiang ruh haduh 7 lak tam na ka bynta ban shna pynthymmai biang ïa ka madan Basketball jong katei ka jaka sah ki heprit.
ïa kane ka madan u Bah Sanbor u la plie ha ryngkat ka jingdonlang u Executive Director BIDS Bah James Thyrniang, Fr. Cyril Tirkey bad Fr. Shemphang Dkhar nalor ki nonghikai, ki nongtrei bad ki khynnah ba sah hangtei.
Shwa kane, u Bah Sanbor u la pynpaw ïa ka jingkmen ba u la ïoh ban don bynta bad ka Children’s Home.
U ong ruh ba kum ki bor pynïaid kim donkam ei ei ban lehraiñ ban pan ei ei na u lada ki don kano kano ka jingdonkam. Na ka liang ka Children’s Homes ka la pynkup burom kyrpang ruh ia u Bah Sanbor kumjuh ïa u Bah Wanlam Khongwir.
Ha kane ka sngi u Bah Sanbor u la sam ruh da ki song jingai sngewbha sha baroh ki nonghikai, ki nongïarap bad ruh ïa ki khynnah.
Hadien kane ka la don ruh ka jingïakhun ba nyngkong ha katei ka madan thymmai hapdeng ka BIDS bad ka Rilang Children’s Home.
