Nongstoiñ, Nohprah 6: U bah Prestone Tynsong symbud Myntri Rangbah ka jylla mynta ka sngi hatmajai, u la hiar sha Riangdo ban plie ïa u mawnongrim jong ki surok kiba la dep trei bad ki bym pat pyntrei kiba hap ha ka Mawshynrut PWD Division.
Ha kane ka sngi la pynlong ïa ka jingïalang plie ïa utei u mawnongrim ha madan phutbol jong ka shnong Riangdo, ha kaba la ïadonlang da u bah Gigur Myrthong MLA ka Mawshynrut, u bah Macmilan Byrsat MLA ka Nongstoiñ, ki ophisar na ki tnad treikam jong ka sorkar kiba dei na Nongstoiñ bad mawshynrut, ki rangbah shnong bad ki paitbah.
Ha shuwa ban plie ïa u maw nongrim la ïoh ïa ka jingkren pdiang na u bah F.Sohlang Executive Engineer ka PWD Nong-stoiñ Division. Nangta la ïoh ïa ka jingpynshai na u bah James NS Lakiang Superintendent Engineer PWD Western Circle Nongstoiñ, ha kaba ïadei bad ka jingtreikam jong ka tnad PWD ryngkat ka jingdon jong ki surok kiba la dep pyntrei bad ki ban sa pyntrei, kum ka surok na Thaïem sha Mawsyrpat kaba jngai kumba 12 kilomitar, kiba la mang pisa da ka sorkar na ka bynta ban pynsuk ïa ki paitbah ha ka leit ka wan, ka kit ka bah bad kiwei kiwei ki jingdonkam ba man la ka sngi.
U bah Prestone Tynsong hadien ba u la plie ïa u maw nongrim, u la ong ba ka jingshah kynthoh jong ka sorkar MDA ba la ïalam da ka NPP ha kine ki sngi ka jur bha, namar ba kitei ki nongkynthoh kim shym lah ban leh ei ei ha ka por ba ki don ha ka sorkar. U la ong ruh ba naduh u snem 2003 u la long nongmihkhmat bad u la lap ba kane ka san snem kaba mynta, ka dei ka snem kaba jynjar tam bad kaba sniew bok tam na ki sorkar baroh. U la pynkynmaw ba ha u snem 2018 naduh ba kane ka sorkar MDA ka la shimti ïa ka jingsynshar, ka jingktah kaba nyngkong eh ka dei ka them Metor, sa ka jingjia ha Ichamati, ka CAB kaba la kylla CAA, ka khlam covid 19 bad kiwei.
U symbud Myntri Rangbah u la kyntu ruh ïa ki paitbah khamtam ïa ki kmie ki kpa bad ki khynnah samla, ba kim dei ban shah ïalam bakla ha ki social media kiba pynphriang ïa ki khubor ki bym shisha. Hynrei ki dei ban sngewthuh bad pynshong nongrim ïa kaei kaba dei bad kaei kaba lait. Hadien ba la plie ïa u mawnongrim u bah Prestone Tynsong u la leit ban plie ruh ïa ka ophis jong u Executive Engineer jong ka PWD Mawshynrut Divission kaba don ha Riangdo.
