Nongstoiñ, Naitung, 14: Na ka bynta ban kyntiew shuh shuh ïa ka phutbol hapoh ka distrik, ka New Nongstoiñ Sport Social & Cultural Club mynta ka sngi, ka la sdang ïa ka tamasa phutbol ha ka madan jong ka club, ha kaba la plie pyrda da u bah Macmilan Kharbani President ka All India Trinamool Congress Nongstoiñ Mandal.
Ha shuwa ban sdang ïa katei ka jingïalehkai la pynlong ïa ka jingïalang ba lyngkot ha kaba la pynïaid da u bah G.Syiemlieh President ka Club bad la ïoh ïa ka jingkren na u bah Macmilan Kharbani uba long u kongsan. U bah Kharbani haba kren ha katei ka sngi kum u kongsan, u la ong ba ka phutbol ka dei kawei na ki jingïalehkai kaba baroh ki paitbah ki sngewtynnad palat ban peit bad ka dei ruh ka jingïalehkai kaba pynlong ïa u briew u ba koit ba khiah ha ka met ka phad bad ka jingmut jingpyrkhat.
U la ong ruh ba ka phutbol kam dei tang ba ka pynlong ïa u briew ba un don ïa ka met kaba koit ba khiah, hynrei ka dei ruh ka jingïalehkai kaba ki samla kiba don sap bad kiba tbit ki ïoh jingmyntoi shibun bad ki lah ban kamai da ki phew lak tyngka na ki club kiba ki mihkhmat ban ïalehkai.
Nalor kata u la ong ba na ka liang jong u kum u nongïalam paitbah, u kwah bad u da angnud haduh katta katta ban don ïa kawei ka Football Coaching centre ha Nongstoiñ, ban ai jinghikai ïa ki samla kiba don sap ha ka jingïalehkai phutbol, namar ki samla jong ka West Khasi Hills ki dei kiba tbit bad kiba don sap bha ha ka phutbol. Hynrei na ka daw jong ka jingbym don ïa ka jaka pyntbit, ka sap bad ka jingtbit jong ki, ka shu kut tang ha kaba leit ïalehkai ha ki club hapoh ki shnong ki thaw kiba don hapoh ka distrik.
Ha ka sngi plie, ka jingïalehkai ka la long hapdeng ka Mawlarshong Sport Club pyrshah ïa ka Umyiap Sport Club, ha kaba ka Mawlarshong SC ka la pynliem noh ïa ka Umyiap SC da san kol la nod.
