Nongstoiñ, Nailur 11: Na ka bynta ban pynkhlaiñ shuh shuh ïa ka jingsumar da ki dawai kynbat Khasi, ka Synjuk ki Nongai Dawai Khasi Nylla West Khasi Hills, ka la dep ban shna ïa ka jaka sumar da ki dawai kynbat Khasi kaba la tip kum ka Meghalaya Traditional Healing Clinic harud ka surok bah National Highway 44 (E) Shillong-Tura, kaba hap ha ka shnong Nongsohpian. Ïa katei ka jaka sumar la shna lyngba ka jingbei pisa jong ka Bio Resources Development Centre Shillong ha ka jinglut kaba phra lak tyngka.
Ïa katei ka jaka sumar la plie ha ka sngi ba ar da u bah Himalaya M Shangpliang MLA, ha ryngkat ka jingsynran lang jong u bah Macmillan Byrsat symbud kongsan
Na ka liang ka Synjuk ki Nongaidawai Khasi Nylla la ïoh ïa ka jingpynshai lyngkot na u bah Osarly Wahlang u ba dei u president ka Synjuk, u ba la ong ba ki don bun bah ki briew kiba la leit ban shah sumar ha ki Hospital kiba paw bha.
Hynrei kim koit satia bad haba la pynphai ïa ki sha shnong ki la hap ban pyrshang ban phah sumar da ki dawai kynbat ha kaba ki ïoh pat ïa ka jingkoit. U la ong ba ki nongsumar da ki dawai kynbat kim dei ban sarong, namar ba ki dawai ki dei tang ban ïarap hynrei u nongpynkhiah pat u dei u Blei.
Ka kong J.P.Lyngdoh Senior saïantis ka BRDC, ka la ong ba ka jingsdang jong ka BRDC ban tei ïa kitei ki jaka sumar kiba la tip kum ka Meghalaya Traditional Healing Clinic, ka la sdang naduh u snem 2020 bad haduh mynta la dep ban shna kawei ha ri Bhoi District, ha West Khasi Hills. Katba ha South West Khasi hills bad ha Garo hills ka jingtei ka dang ïaid shait shait.
Ka la ong ruh ba ka jingtei jong ka BRDC ïa kitei ki jaka sumar, ka long ruh na ka bynta ban kyntiew ïa ka ïoh ka kot bad ban ai jinghikai ïa ki samla kiba don ka sap ban sumar ïa kiba pang ba shitom da ki dawai kynbat. Nalor kata ka la ong ruh ba ka jingdon jong kitei ki jaka sumar kan khring ruh ïa ki nongwan jngohkai na shabar ri ba kin wan ban wad jingtip ïa ki jait dawai bad ban pah sumar ruh.
U bah Shangpliang haba kren kum u kongsan u la ai ka jingïaroh ïa ki nongai dawai kynbat Khasi kiba la la lah ban trei shitom bad ban ïarap ïa shibun bah kiba pang kiba shitom kiba la duh jingkyrmen.
U la ong ruh ba watla katta ruh ha kaba ïadei bad ki ba shitom na ki jingaksiden, ki nongai dawai kynbat ki dei ban dap hah shuwa sha ki hospital sorkar ba kin Exray, ban lap ïa ki jingmong hapoh ka met u nongpang bad kin sa phah wan pat ha kitei ki clinic ban sumar da ki dawai kynbat, namar don teng teng ba lada u ba aksiden u dkut ka kjat, ki Doktor sorkar ki lah ban ong ba dei ban ot noh.
Hynrei, lada sumar da ki dawai kynbat pat tang hadien shi bnai ar bnai u nongpang u la lah ban mareh. U la kyntu ruh ïa ki nongai dawai kynbat ba kin nang pynkhlaiñ shuh shuh, khnang ba kan long ka jingmyntoi na ka bynta ki paitbah kiba pang ba shitom.
