Nongstoiñ, Ïaïong 30: Ka jingdon jong ka Civil Hospital ha Nongstoiñ ka la long ka jingmyntoi kaba khraw ïa ki paidbah kiba pang ba shitom na kylleng ki jaka jong ka West Khasi Hills. Katba nang mih ki sngi ka rukom sumar ïa ki nongpang katkum ka juk stad saïan kaba mynta ka la nang kham kiew wat la ka jingdon jong ki nongtrei kam pat da biang pura kumba ka dei ban long.
Wat la katta ruh ki nongtrei ha katei ka jaka sumar ki la pyrshang katba lah ban trei shitom bad ban pyndep hok ïa ka kamram kaba ki dei ban trei. Ha ki snem ba la dep naduh ki Doktor ki Nurse bad ki paitbah ki la don ka jingangnud ba ka sorkar ka dei ban pynbiang ïa ki tiar ki tar na ka bynta ban examin ïa ki nongpang kum ka Ultra sound, Xray bad khamtam eh ba don noh ka Intensive Care Unit ka jaka sumar kaba kham kyrpang na ka bynta kito ki ba la shitom jur bad kiba la tlot ha kaba ring bad pynhiar mynsiem. Katei ka jingangnud ka la urlong ha kaba ïa katei ka kamra sumar pang kaba kyrpang (ICU) kaba don san tylli ki jingthiah la sdang ban pyntreikam naduh u snem ba la dep, hynrei dang plie paitbah ha kane ka sngi balang ka 30 tarik u Ïaïong da u bah Gabriel Wahlang MLA ka Nongstoiñ constituency.
Ha katei ka sngi shuwa ban plie ïa katei ka ICU la pynlong ïa ka jingïalang ba lyngkot ha OPD room, ha kaba la pynïaid da u Doktor H.R.Sohkhlet Medical Superintendent jong katei ka jaka sumar bad la ïoh ruh ïa ka jingpynshai na u Doktor B.Myrthong bad u Doktor W.Labang, ha kaba ïadei bad ka jingsumar ïa ki nongpang kiba la jur palat ki bym lah shuh ban ring bad pynhiar mynsiem bad kiba la donkam kyrkieh ban pynkhlaiñ bad pynbiang pat ïa ka jingring bad pynhiar mynsiem lyngba ki kor ki bor ba la pyndait lang da ka oxygen.
Ha kajuh ka por la ïoh ïa ka jingkren na ka Dr M.Sohliya District Medical & Health Officer West Khasi Hills, bah Valentine Swer Additional Deputy Commissioner u ba la wan ban mihkhmat ha ka jaka jong u bah Garod L.S.N.Dykes Deputy Commissioner bad khatduh eh la ïoh ïa ka jingkren na u bah Gabriel Wahlang MLA u ba long u kongsan.
U bah Wahlang haba ai jingkren kum u kongsan u la kyntu ïa ki nongpang bad ki nongap ïa kiba pang ba kin ïatreilang bad ki Doktor, ki Nurses bad kim dei ban haram than ïa ki Doktor bad ki Nurses khnang ba kan ym don kano kano ka jingsngew buhkhoh jong ki nongpang.
Nalor kata u la pynkynmaw ruh ba ki paitbah kim dei ban shah ïalam bakla ha kiba pyntieng ba kim dei ban shon adhaar ne MHIS card, namar ka jingdon ïa ki MHIS card ka dei ka jingmyntoi kaba khraw khamtam ïa kiba duk ba kyrduh.
