Nongpoh, Jylliew 27: U Bah Charles Marngar MDC ka Mawhati Constituency mynta ka sngi u la leit ban plie ïa ka kamra klas jong ka skul Mawkathiang Makdoh Secondary School kaba don haka shnong Umpohwin ha Ri-Bhoi District da ka thong ban dang pynbha ïaki kamra klas ha katei ka skul naka bynta ka jingmyntoi jong ki khynnah skul bad ban dang kyntiew ïaka pule puthi ha katei ka thaiñ.
Ïa katei ka kamra klas la mang pisa lyngba ka MDC Scheme, excluded area jong u snem 2019-2020 bala sakhi ruh da ka jingdonlang u Bah R.R Kynsai Makdoh, ki Rangbah jong ka kur Makdoh bad kiwei kiwei.
Ha kane ka sngi la ioh ruh ban pynkup burom ïa 4 ngut ki samla na katei ka skul kiba la pass bha haka eksamin SSLC kiba kynthup ïaka samla Wanpynhun Sutting, Daiarhun Masharing, Dahunhi Shadap bad ka Yorly Syngkli.
Haba kren ha katei ka sngi naka liang u Bah Charles Marngar u la pynpaw ka jingsngewkmen kaba khraw bala lah ban plie paidbah ïaka kamra klas ha katei ka sngi, khnang ba ki khynnah pule kin ioh ki kamra klas ba biang ban dang pyntyllun ruh ka shalyntem jong ka jingnang jingstad ha katei ka thaiñ kumba ka pule puthi ka dei ka atiar ha kane ka juk ba mynta.
U la kyntu ruh ïaki khynnah ha katei ka sngi ba ki dei ban minot thop ym tang ba kin ioh ïaki kamra klas kiba biang hynrei ban don ruh ka thong haka jingim jong ki ban dang kiew shaphrang ha baroh ki liang khlem da pynsepei kai ïaka por namar ki heprit ki long ka lawei jong ka jylla.
