Shillong, ïaïong, 04 : Ka Sts. Peter bad Paul Church, Parish Pynthorumkhrah ha ka 3 tarik mynta u bnai ka la plie ïa ka jingrakhe Jubilee 25 snem da ka jingkyntiew ïa ka Lama da u MLA ka Pynthorumkhrah Constituency u Bah Bah Alexander L. Hek.
Ha kane ka jingsdang ban rakhe ïa kane ka jubili, la pynkhreh ban pynlong ïa ki jinglehkmen ha baroh shisnem ïa kaba yn pynkut ha ka 5 tarik, Rymphang, 2023.
Shwa ban plie ïa kane ka jingrakhe jubili na ka liang jong ka Parish Pastoral Council bad u Parish Priest ka Pynthorumkhrah Parish u Sohblei Laurence Nongkseh u la ai ka lamphrang jong ka jubili ba kan don jingshimbynta jong ki paidriewngeit ka Balang naduh ki Sub District, ki CMC, ki Seng Samla, ki Seng Rangbàh bad ki Seng Kynthei.
La pynïaid ïa kane ka jingplie jubilee da u Bah Dominic K. Lanong katba u Vice Chairman jong ka Parish Council u Bah Dominic Sawkmie u la ai ka jingïathuh khana lyngkot halor ka jingsdang jong ka Parish Pynthorumkhrah.
U la ong, ka Balang Katholik ha Pynthorumkhrah Parish ka dei ka matti ban kynmaw tympang ïa ki kam jong u mishoneri na shiliang duriaw uba dei u Sohblei Peter Schiavon (bam kwai ha dwar u Blei).
Ka Parish Pynthorumkhrah kumba ka long mynta ka dei ki kam bad u soh ba la ngam tyllong da u Sohblei Peter Schiavon kum u Parish Priest banyngkong naba u la long u nongseng, u nongshna ïa ka Iingmane, ïa ka skul, u la long u nongïalap, u nongïarap ïa kiba duk, la ïathuh u Bah Dominic.
Ïa ka Parish Pynthorumkhrah la plie naduh u Snem 1997 bad ka la ïaid lynti 25 snem haduh u Bnai Ïaiong, 2022.
U Sohblei Sohblei Peter Schiavon u dei u nongsaiñdur ïa ka jingnang jingstad ha Pynthorumkhrah Parish naduh ba wan u la sah nyngkong ha Pynthorumkhrah bad u la im bad ki paid u Blei jin haduh 19 snem tad haduh ba un da khladnoh na kane ka sla pyrthei.
Na ka bynta ka jingkynmaw ieid ïa u Sohblei Peter Schiavon ki paidriewngeit bad ka Parish Council kan pynieng da u motdur ha phyllaw jong ka Iingmane.
Hadien kane jingïalang,la pynkut da ka nguh ka dem Blei ïa kaba la pynmynta da u Parish Priest u Sohblei Laurence Nongkseh bad la pynshongkun ïa ka jinglehniam da ka Sts. Peter &Paul Choir.
