Plie u Bah A.L Hek ïa ka jingrakhe Jubilee Rupa ka Seng Samla Catholic Block-C Umsning Parish

Nongpoh, Naitung, 20: Kum ka jingphaidien halor ka jingïaid lynti ba kum ki samla ki la shakri haka kam ka jong u Blei, ka Seng Samla Catholic Block-C jong ka Umsning Parish, ha ka sngi Saitjaiñ ka la sdang ban rakhe ïa ka jingdap 25 snem ka seng samla ba ka la ïaid lynti naduh ba la seng ha u snem 2001 bad ïa kane ka jingrakhe ïa ka jubili rupa kan sa pynkut ha u bnai Naitung 2026.
Ïa kane ka jingsdang rakhe ïa ka jubili rupa ka Seng Samla Catholic Block-C ka Umsning Parish, la pynlong ha Madan Umsning Patarim, ha kaba la wan ban plie paidbah da u Bah A.L Hek myntri sorkar ka jylla kum u kongsan bad la sakhi lang ruh da ka jingdon lang u Fr. Fr. Laurence Kharluni, u Bah Ioanis Syiemlieh, President ba nyngkong ka Seng Samla Catholic Block-C, u Bah Rocky Kylla, Chairman ka Umsning Town Dorbar, u Geraldo Syiemlieh, President ka Seng Samla Catholic Block-C lem bad kiwei.
Ha kane ka sngi la ïoh ban pynher ïa ka lama jong ka Seng Samla Catholic Block-C da u Bah A.L Hek kum ka jingsdang ka jingrakhe bad bud sa ka jingïalehkai phutbol paralok hapdeng ka Ri Bhoi Police pyrshah ïa ka Seng Samla Catholic Block-C, ha kaba ka Seng Samla Catholic Block-C ka la lah khur ïa ka nam jop hadien ba la pynrem ïa ka Ri Bhoi Police lyngba ka jingïashut tie breaker.
Kum ka jingai mynsiem ïa ki samla ka Seng Samla Catholik Block-C, u Bah A.L Hek kum u kongsan u la bet ruh katto katne ki symboh pyrkhat sha ki khun samla, ba kane ka jingrakhe ïa ka jubili rupa ka dei ban long kaba don jingmut bad kum ki khun samla kim dei ban phai dien bad ki dei ban jam shakhmat na ka bynta ban shakri ym tang ïa ka kam ka jong U Blei bad ki dei ruh ban don ka jingkitkhlieh na ka bynta ka imlang ka sahlang.