Nongpoh, Nailar, 08: U Myntri ka tnad Community & Rural Development u A.T Mondal mynta ka sngi kum u kongsan u la plie paidbah noh ïa kawei ka ïew ba la tip kum ka Traditional Market ha Lumdaitkhla Bhoirymbong, kaba dei kawei na ka ïew ba la shna da ka sorkar ban kyntiew ïa ka ïoh ka ka kot ki nongshong dukan bad ruh ba kin ïoh ïa ka kata ka jaka kaba paka ha ki khaïi pateng kiba dei lyngba ka jingshong dukan.
La shim bynta lang ruh ha kane ka sngi da u Bah A.L Hek myntri ka sorkar jylla kum u symbut kongsan bad la sakhi ruh da ka jingdon lang u MLA ka Umroi, u Bah Damanbait Lamare, u MDC ka Umroi, u Bah Isyneie Hinge, ka BDO ka Bhoirymbong C&RD Block, ka Dr. R. Talang, u Rangbah Shnong ka Lumdaitkhla u Bah S.T Rympei, ki ophisar, ki nongïalam shnong bad ki paidbah nongshong shnong katei ka thaiñ.
Kane ka Traditional Market ka don haduh 66 tylli ki kamram dukan bad la tei ïa kane ka Traditional Market lyngba ka jingmang tyngka da ka Ministry of Tribal Affairs ha ka jinglut kaba la kot T. 5 klur.
Haba kren ha kane ka sngi kum u kongsan, u A.T Mondal u la pynpaw ïa ka jingkmen kaba khraw ba la lah ban plie paidbah ïa kane ka ïew ïa die lang ne kata ka Tradition Market bad ka jingdon kane ka iew ka dei ban ai jingmyntoi ban kyntiew ïa ki nongshong dukan bad ruh ha ki kam khaïi pateng ki paidbah katei ka thaiñ.
Kum u myntri sorkar u la kyntu ruh ïa ki bor shnong ba kin sumar bha ïa kane ka iew bad ruh ban leh ha kata ka rukom ban dang lah ban kyntiew ïa ki kam khaïi khang ba lyngba ka jingdon kum kine ki iew kan ai jingmyntoi ym tang ïa ki nongshong dukan bad ïa ki paidbah katei ka thaiñ hi baroh kawei.
Kiwei kiwei kiba la ai jingkren ha kane ka sngi ki kynthup ïa u Bah A.L Hek kum u myntri sorkar bad u MLA ka Umroi u Bah Damanbait Lamare, ha kaba ki la pynmih kajuh ka sur, ba ka jigndon katei ka Traditional Market ka dei ban ai jingmyntoi ïa ki nongshong dukan bad ruh ïa ki paidabh katei ka thaiñ ha ka kam ban kyntiew ïa ka ïoh ka kot lyngba ki kam khaïi pateng.
