Mawkyrwat, Ïaïong 18: Ka Hynñiewtrep Youths Council (HYC) jong ka Mawkyrwat Circle mynta ka sngi ka la ïoh ban plie pyrda ïa ka lympung ïalehkai kynjatbol ba la tip kum 1st Memorial Sngap Sing Syiem Football Tournament 2022 ha kaba u Pa’iem Niandro Syiemiong, u Syiem jong ka Hima Maharam Syiemship u long kum u kongsan ha Madan Artificial Turf, MDSA, South West Khasi Hills District.
Ha kane ka sngi sdang jong kane ka lympung, la pynïalehkai sdang da ka Lamare Sports Club na Shillong bad ka Mawkyrwat Sports Association na Mawkyrwat ha kaba ka jingïalehkai ka long shisha kaba itynnad bad kaba ïa biang bor. Katba ki minit ki la nangïaid na ka liang ka Lamare SC ka la ïoh ban pynkhih nyngkong eh ïa ka jar ha ka minit kaba 27 lyngba u Donlad Diengdoh bad kumjuh ruh ka Mawkyrwat SA da ka jingïakhun kaba tyngeh ka la ïoh ban pynphai ha ka minit kaba 30 lyngba u Jied Syiemlieh lyngba ka penalty.
Shuh shuh ha kane ka jingïalehkai ka Lamare SC ka la ïoh biang ban thep sa ïa ki ar tylli kol kata ha ka minit kaba 35 na u Dajied Wanshong bad kumjuh ruh ha ka minit kaba 36 na u Donlad Diengdoh. Kumta ha ka jingïalehkai jong ka kyllastep, ka Lamare SC ka la ïoh ban tam da 3 – 1 kol pyrshah ïa ka Mawkyrwat SA.
Haba wan phai biang ha ka jingïalehkai jong ka kyllamiet, ka jingïalehkai ka la sdang kham itynnad ha kaba ki ‘rangïalehkai jong baroh ar kynhun ki la sdang ban ïa khun tyngeh ban pyneh ïa la ki dohksah khnang ban ïoh ban pynjop ïa la ka jong ka kynhun. Hynrei hapdeng ka jingïaleh, ka Mawkyrwat SA ka la ïoh ban thep biang sa ïa ka kol kaba ar lyngba u R.K. Wanniang ha ka minit kaba 52 bad ka Lamare SC pat shwa ban kut ka jingïalehkai ka la ïoh biang ban pynrung ïa ka kol hapoh ka kol ha ka minit kaba 70 lyngba u Oversharp Iawphniaw.
Namarkata, haduh ba kut jong ka jingïalehkai ka Lamare Sports Club ka la ïoh rah ïa ka nam jingjop da kaba ka la tam noh da 4 – 2 kol ïa ka Mawkyrwat Sports Association.
U Pa’iem Niandro Syiemïong kum u kongsan haba kren ha ka jingïalang shwa ban sdang ïa ka lympung, u la pynkynmaw ba u Sngap Sing Syiem u dei u Syiem ba khatduh na ki Syiem Khasi kata ha u snem 1859 uba long ruh u Syiem ba Hynñiew na ki Syiem kiba la shynshar ïa ka Hima Maharam ha kaba ka thma ba khatduh ba u la ïaleh pyrshah ïa ki phareng hapoh jong kane ka Ri Khasi.
Ha kajuh ka por u la ai ka jingïaroh bad ai mynsiem ïa Hynñiewtrep Youths Council (HYC) Mawkyrwat Circle ba ki la kynmaw kyrpang na ka bynta ban pynlong kum kane ka lympung ïalehkai kynjatbol ban pynsah nam ïa ka kyrteng ‘U Sngap Sing Syiem’ lyngba kane ka ‘1st Sngap Sing Syiem Football Tournament 2022’ ha kaba kane lympung kan dei kawei na ka bynta ban pyn-i ha ka pyrthei kumno ban lum ban lang na ka bynta ki khun samla ba kin don ka jingïatylli para khasi hapoh jong ka distrik bad kumjuh ruh ha baroh ka Bri u Hynñiewtrep Hynñiewskum.
U la ai mynsiem ruh ïa baroh ki 16 tylli ki kynhun kiba la wan ïa shim ynta ha kane ka lympung ïalehkai ban kin ïalehkai bha bad pyn-i ïa ki sap ki phong ki jong ki khnang ba kin lah ruh ban nang ïai kiew ha ki kam ïalehkai bad ba kan long ruh kum kawei na ki lad kamai jakpoh na ka bynta jong ki hi.
Ha kane ka sngi hadien ba kut jong ka jingïalehkai la ïoh ruh ban sam ïa ka khusnam u ‘rangïalehkai ba kynsai kata sha u Donlad Diengdoh uba la ïoh ban thep ïa ki ar tylli ki kol.
Kiba ïa don lang ha kane ka sngi ki long naduh u bah Donbok Kharlyngdoh, Vice President jong ka HYC Central Body kum u symbud kongsan, u bah W.L Snaitang, Secretary Shnong Mawkyrwat, u bah H.S. Diengdoh, MCS, SDO ba la shongthait jong ka Ranikor Civil Sub Division, u bah Y.G. Lyngdoh, Working President ka Mawkyrwat District Sports Association (MDSA) lem bad kiwei kiwei ki ‘riew rangbah.
