Shillong Nohprah 04 : U Symbud Myntri Rangbah ka Jylla u Bah Prestone Tynsong hynin ka sngi u la plie pyrda ïa ka jingrakhe ïa Jubili Rupa jong ka skul Rairiat Ai Jingshai SSA LP bad UP School jong ka Seng Trei Mon Sngewbha Society kaba don ha ka shnong Nohwet, Pynursla Constituency.
Ha kane ka sngi la donlang ruh ka MDC ka Nongshken ka Kong Grace Kharpuri, ki nongïalam shnong, ki nongpynïaid, nonghikai bad ki khynnah skul ryngkat bad ki paid nongshong shnong.
Na ka liang u Bah Prestone haba kren kum u Kongsan u la ïaroh ïa ki nongïalam kiba la ïohi jngai ban seng ïa kane ka skul kaba la ai jingnang jingstad ïa ki khynnah bad kitbok ruh ïa kane ka skul ba kan dang bteng ban ai jingshakri bad kan sei shuh shuh ïa ki rishot na ka shnong Nohwet bad na ka thain Riwar.
Shuh shuh la ïathuh ba u lah pynrung ha ka skim ban pynbit pynbiang ïa kane ka madan jong ka skul na ka bynta ka bit ka biang jong ki khynnah bad ki nonghikai skul bad ula kular ruh ban shimkhia bad ban khmih bniah bad ban pyrshang ban pynurlong ïa ki jingangnud jong ka skul.
Ha kajuh ka por u la kyntu ïa ki kmie ki kpa ba kidei kiba donlang ïa ka jingkitkhlieh ban ai ka jingkyntu bad ban sneng ïa la ki khun ha la ki iing ki sem ki jong ngi bad ban saindur ïa la ki khun ha ka jingpule namar ki tip kham bha ma ki ban ïa ki nonghikai.
“Ki kmie ki kpa ki dei ban ai jinghikai ïa la ki khun khamtam eh ba kin nang ban sngewnguh ïa u Blei, ïa la ki kmie ki kpa bad ban ym pynlehnoi ïa ka jingnang jingstad bad lada lah ban leh ïa kane, kumta kan ym don kano kano ban sheptieng ïa la ki khun kiba la ieng ha ka nongrim kaba skhem,” u la ong.
U Symbud Myntri Rangbah u la ai ruh ka jingïaroh ïa ki nongïalam kiba dang im bad kiba la khlad noh jong ka Seng Trei Mon Sngewbha Society1kiba la shimkhïa ban seng ia ka skul.
U Bah Prestone u la ïathuh ruh ba hashwa ban wan sha kane ka jingrakhe, u la leit jngoh ïa uwei u riewrangbah u ba don bynta lang ban seng ïa ka skul hynrei mynta u don hapdeng ka jingpang jingshitom.
“U la pasiaw ïa nga ba ngi donkam kyrkieh ïa ka bos skul bad ngin sa pynurlong ïa kane ka jingangnud une u riewrangbah ha u snem ban wan,” la pynbna u Bah Prestone.
Katba na ka liang ka MDC ka thain, Kong Grace Kharpuri ka la kyntu ïa ki khynnah ba kin pynleit jingmut bad ban kheiñkor bha ïa ka jingpule da kaba ong ba ka pule ka puthi ka long ka atiar kaba khlain bha ban wanrah ïa ka jingkylla ha ka pyrthei.
“Dei lyngba ka jingïohi jngai jong ki nongïalam kiba la seng ïa kane ka skul, khnang ba kan wanrah ïa ka nam bad burom ïa kane ka shnong bad ïa ka thain baroh kawei.”
Lah ban kdew ba ïa kane ka skul la seng ha u snem 2001 bad kane ka skul ka la ai jingshakri ha kaban pynnang pynstad ïa ki khynnah kane ka thain mynta la 25 snem.
Ha kane ka sngi la pynkup burom ruh ïa ki nongseng jong kane ka skul bad la plie ïa u mot sahkynmaw bad la pynher ïa ka lama jongka jingplie ïa ka Jubili Rupa jongka skul bad la pyniphuh iphieng ïa kane ka jingrakhe da ki jingrwai bad jingshad na ki khynnah skul kiba mynta bad kiba mynshwa.
